السلام عليكم
مقصره فى حق الرؤيه الاسلاميه وبانب فى نفسي بقالي كتير والله
بس غصب عني موضوعات الرؤيه بتحتاج شغل شويه ووقت
نشوف النهارده بقى هانتكلم عن الحكمه ان شاء الله وهانقول ايه :
يؤتي الحكمة من يشاء ومن يؤت الحكمة فقد اوتي خيرا كثيرا وما يذكر الا اولوا الالباب
سورة البقرة- آية 269
سورة البقرة- آية 269
مكانة الحكمة
طيب اولا يعنى ايه حكمه :
الحكمة المعرفة الجيده بالأمور وفهمها كما يجب والراي الصائب والمقدره على وضع الأمور في نصابها الصحيح والتحدث بما هو صحيح والعمل به فعلا .
يا ترى اية هي مكانة الحكمه فى القرآن وعند ربنا سبحانه وتعالى وايه اهميتها ؟
شايفين الايه فوق بتقول ايه ؟
بتقول يؤتي الحكمة من يشاء
بتتكلم عن الحكمه على اساس انها هبه وعطيه من الله سبحانه وتعالى
بس شوفوا اتبعت بايه ومن اوتي الحكمه فقد اوتي خيرا كثيرا
طيب وباقي النعم الى ربنا اعطاهالنا ؟؟
وَمَا أُوتِيتُم مِّن شَيْءٍ فَمَتَاعُ الْحَيَاةِ الدُّنْيَا وَزِينَتُهَا وَمَا عِندَ اللَّهِ خَيْرٌ وَأَبْقَى أَفَلا تَعْقِلُونَ
طيب والايه دي
المال والبنون زينة الحياة الدنيا والباقيات الصالحات خير عند ربك ثوابا وخير املا
برضه نفس المعنى تقريبا
طيب والملك والسلطان والعز ؟؟؟
قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شيء قدير
انما الحكمه ؟
خيرا كثيراااااااا
يؤتي الحكمة من يشاء ومن يؤت الحكمة فقد اوتي خيرا كثيرا وما يذكر الا اولوا الالباب
سورة البقرة- آية 269
بس ايه ؟
وما يذكر الا اولوا الالباب
طيب خلونا نستعرض ورود كلمة الحكمه فى القرآن ونعرف مكانتها اكتر
الحكمه ذكرت فى القران كثيرا ولكن فى الاغلب كان ذكرها مرتبط بحاجتين الانبياء و الكتب السماويه
ولكن فى غير اقتصار عليهم فهو يؤتي الحكمه من يشاء مش الانبياء فقط يعنى
هانشوف ده من خلال الايات
الايه دي على سبيل المثال :
لقد من الله على المؤمنين اذ بعث فيهم رسولا من انفسهم يتلو عليهم اياته ويزكيهم ويعلمهم الكتاب والحكمة وان كانوا من قبل لفي ضلال مبين
سورة آل عمران - آية 164
الحكمه اقترنت بالكتاب ( السماوي )فى القرآن بالظبط 9 مرات ودي مكانه واضحه للحكمه
خلينا نشوف كمان ذكرت الحكمه فين واعتبرت فضل الله تعالى على انبياؤه
لما نتكلم عن داود فى الايتين دول
فهزموهم باذن الله وقتل داود جالوت واتاه الله الملك والحكمة وعلمه مما يشاء البقرة
وشددنا ملكه واتيناه الحكمة وفصل الخطاب سورة ص
وزي ما قرن الحكمه مع الكتاب والنبوه دايما فى الايات الى اتكلمنا عنها
في الايه دي ومع داود قرن بينها و الملك
لا مش الملك بس الملك القوي الشديد الى ربنا قواه فعلا ليصبح ملك عظيم الى هو كان ملك داود عليه السلام
وربنا كمان وهبه ايه بعد الملك القوي الحكمة اصلها حاجه مهمه اوي وكبيره اوي
وفصل الخطاب : الى هو تمييز الكلام الصح من الخطأ والتحكيم بين الناس برضه ياريت نلاحظ المكانه دي لفصل الخطاب
شوفوا كمان الحكمه جائت على لسان عيسى عليه السلام ازاي
ولما جاء عيسى بالبينات قال قد جئتكم بالحكمة ولابين لكم بعض الذي تختلفون فيه فاتقوا الله واطيعون الزخرف
كمان خلينا نشوف كمان الايه دي
ذلك مما اوحى اليك ربك من الحكمة الاسراء
ودي كانت بعد اوامر الاهيه طووويله كلنا يمكن نعرفها بداية من
وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا
وباقي قائمة الأوامر الى وردت فى الايه دي
وختمت الأوامر أو النصائح بانها وحي بالحكمه من الله عز وجل
ودي المكانه الى بتوضع فيها الحكمه دايما من الله
دايما ربنا بيتكلم عن الحكمه على انها هبه عظيمه الشأن يهبها لعباده الصالحين زي الهبه الى ربنا بعتها للقمان
ولقد اتينا لقمان الحكمة ان اشكر لله ومن يشكر فانما يشكر لنفسه ومن كفر فان الله غني حميد لقمان
اغنانا وغناكم الله من فضله ان شاء الله
نسأل الله تعالى ان يرزقنا الحكمه واياكم
واتمنى اكون افدتكم فعلا
وما اكونش طولت عليكم
جيتي على وتر حساس المره ديه
ردحذفالحكمه بننساها كتير
بنفتكر مكانها الغضب والاندفاع والقلق والغرور ومية حاجه وحاجه بتتأخر الحكمه وراهم رغم ان الحكمه لازم هيا اللي تحكم الحاجات ديه كلها
بس عارفه, سبحان الله, الحكمه ديه ليها حلاوه وبتصيب النفس بحالة رضا وسكينه, لما الواحد يحس ان اللي عمله فيه حكمه
اللهم ارزقنا حكمه ترضى بها عنا وتبلغنا بها جنتك
احمد ابو العلا
ردحذفاللهم امين يارب
فعلا احنا بننساها بندفنا ونطلع على الوش الهيافه بعيد عنك
وعجبنى اوي وصفك لحالة الرضا لما الواحد يحس انه الى عمله فيه حكمه
تحياتي بجد على اضافتك الجميله
نورت
تسلم ايدك
ردحذفكلام يفوق الواحد
تسلمى يا واندا نورتي
ردحذفالحكمه الله يكرمك يا صبرنى
ردحذفراحت وغابت الحكمه عن شعوبنا العربيه
ومقطعيين بعض ومفرجيين علينا الامم
فين الحكمه فين
بوست حلو اوي
ردحذفجميله المدونه دي .... اول مره ازورها
تحياتي
فتاه من الصعيد
ردحذفاول مره تزوريها ؟؟
طيب انا الحق عليا بجد عشان بقالي كام شهر مش نزلت فيها مواضيع
حسسووووني بالذنب بقىىىىى
نورتي يا جميل
محاسن صابر
ردحذفعليكى نور
راااااااحت حتى اولي الامر مفتقدينها مع ضميرهم بالمره
و هل من الحكمة ان تقولي على شعب مسلم يؤمن بلا اله الا الله محمد رسول الله باولاد تيييييييييييت في احد ردودك عوضا ان تبحثي عن من اشعل الفتنة اليس من الحكمة ان تحزني لان شعبين مسلمين اصبحا اكثر من الاعداء ام ان الحكمة في كتابة بعض الايات و الاحاديث فقط . في قضية الجزائر و مصر و في هذه الايام المباركة كل من يكتب كلمة سيحاسب عند الله بالضعف لان المسالة ليست بالهينة انها فتنة و الفتنة اشد من القتل فالنتقي الله في ما نكتبه و خاصة اصحاب المدونات المعروفة .
ردحذفجزائريه
ردحذفهى ولاد تييييييييت دي شمته وحشه اوي يعنى ؟؟
هو يعنى ايه تييييييييت دي ؟؟؟
دي مش شتيمه والله ولا حاجه دي يعنى احنا بنقولها بدل ما نشتم
وطبيعى اكون متغاظه منكم يعنى
يعنى انتى لو مكاني ما تتغاظيش ؟؟
طب ده انتم مضحوك عليكم من وسائل الاعلام بتاعتكم ومتغاظين مننا
طب احنا الى شوفنا الناس بعنينا يا فندم وعلى صله شخصيه بهم
نبقى متغاظين ولا لا
وعموما فى الايام دي او فى غير الايام دي احنا هانتحاسب على كل كلمه بنقولها
ورضيت بحساب ربي العادل ونعم به
والفتنه من احدثها الله اعلم اسألى ولما تعرفي قوليلى وقولي لولي امرك وامري يقطع راس الفتنه
نورتي يا جزائريه
ما شاء الله
ردحذفجزاك الله خيرا على هذا الجهد الطيب
د. كافي
ردحذفمتشكره اوي ربنا يكرمك
ونورتنا
بارك الله فيكم
ردحذفجزاكم الله كل خير
شكرا يا دكتور ابراهيم
ردحذفبصراحه اجمل حاجة ان الواحد يعيش مع القران
ردحذفانا قولت مش حسيبك
ردحذفالا لما تحطيلى صورة الفطير
بس خلاص عفونا عنك ياصبرنى
فطوم عيشتنى فى حلم الفطير عندها :-)))
بس عندى سؤال
لما اسال ناس فى مدونات ثانية بينفضولى
عادى:-))
بصى ياجميل
ايه الفرق بين تصلى الفجر بعد الاذان او تصليه قبل شروق الشمس؟؟؟هل تعتبر برضه فجر
يعنى الصبح من ساعة شروق الشمس؟؟؟
و ايه هى صلاة الضحى يعنى علىالساعة كام ؟؟ لو 12 طيب لو الظهر اشاشا قبل 12؟؟ يبقى الضحى ده امتى ؟؟؟
ما تخافوش
ردحذفونعم بكتاب الله صاحبا ونورت
واندا
ردحذفانا اقدر انفضلك يا بطه
ما اقدرش ابدا بتيتا واطلاقا
اولا صلاة الفجر وقتها من اذان الفجر للشروق
بعد الشروق تبقى بتصلي الفجر قضى
صلاة الضحى دي سنهيمؤكده
ووقتها من بعد ارتفاع الشمس
يعنى تقريبا بعد الشروق بثلث ساعه كده
وحتى وقت الزوال الى هو ادان الظهر
وتنفع تصليها من ركعتين حتى اربع ركعات
بس خلاص ايتها خدمه يا قمر
الفطير بقى ما كنتش اعرف انه هاثر على افكارك كده والله
هههههههههههههههههههههه
صحيح
ردحذفوش مكسوف مشكرتكيش على الرد من زمن
بس انت اتاخرت عليا و انا قراته وانا بفطر الصبح فملحقتش ارد
متشكرين على المعلومة
بس ليه الفجر قضاء ؟؟ مش يبقى الصبح حاضر ؟؟ لحد اذان الظهر ؟؟ و بعدها يتصلى قضاء
اه
انت عملة 3 مدونات منفصلة ليه ؟
سوال كمان
قوليلى رايك هل البنت الى بتكتب مدونات او ليها حساب فى الفيس بوك و بتتكلم مع اغراب غلطانة؟؟حتى لو الكلام باحترامه زى ماتتكلم مع اى حد و مش واخذه الموضوع ساتر لعمل بلاوى ؟؟
ايه الى قومها فى بالى اغنية كينج كونج :-) سمعتيها؟؟
يعنى اعتقد دلوقتى الى بيرتبط بحد
مش حيسال ليك تجارب سابقة بس:-)
لا حيسال ليك فى الفيس بوك و البلوجر و الخ :-))
واندا
ردحذفاشعقول كده يا جودعان منوره المدونات كلها
شكرا على ايه يا جميل
ياريت ابقى اقدر افيدك دايما انا برضه مش علامه يعنى لكن تاكدي مش هاقولك حاجه مش متاكده منها
بالنسبه لصلاة الفجر هو كده وقت صلاة الفجر فى الظلام قبل الشروق
ايه الى ليه ايه الناس دي يا اخواااتي
وليه عملت اكتر من مدونه
عشان انا باتكلم فى 3 حاجات ما لهمش علاقه ببعض خالص
لقيت التبويب لوحده مش كفايه
كان لازم الموضوعات الدينيه تكون لها مكان لوحده عشان حرام تتوه وسط الرغي اصل انا باتعب فيهم جامد بصراحه
وطبعا مدونة الطبخ يرضيكى تبقى ريحة التقليه طالعه كده فى وسط الكلام يعنى
هههههههههههههههه
اما السؤال الاخير يا واندا يا عزيزتى عايزله قاعده طويله عريضه عشان اجاوبك عليه
لكن خدي اقري البوست ده وانتى تعرفي رايي
http://raghy-emraao-gheer-mathona.blogspot.com/2008/04/blog-post_11.html
وده اميلى بقى يا جميل لو فى اي حاجه تانيه عايزه تعرفيها عني
sbarny_yarb@yahoo.com
مش قلت وجع دماغ ؟
ردحذفما علينا
الحكمة ضالة المؤمن أينما وجدها فهو أحق بها هكذا أخبرنا خير الخلق صلى الله عليه وسلم
وهى مرد البشرية منذ القدم وحتى تقوم الساعة وقد سعى إليها الفلاسفة والعلماء على مر العصور ولكن الله تعلى يهبه من يشاء من عباده
وكان فى مدونة بره ناقشت الموضوع ده من فترة كبيرة
يا ريت تراجعيها
http://nononlin.blogspot.com/2008/11/blog-post.html
صحيح مش هاتستفيدى بس تتكدرى زى ما انا اتكدرت وجيت هنا والا ايه ؟
السلام عليكم ورحمة الله وبركاتة
ردحذفبسم الله ما شاء الله عليكى ربنا يزيدك وينفع بيكى الناس الواحد على قد مبيفرح ان فية نساء مسلمات زيك كدة مهتمين بامور دينهم على قد مبحس انى مقصر فى حق الله والاسلام لانى ازهرى وعندى خلفية كبيرة عن الدين لكن محاولتش اكتب ولا بوست اسلامى لكن ليا فيكى اسوة حسنة ان شاء الله مش عارف اقول اية بس انا فرحان بيكى والله
تحياتى ليكى وجزاكى الله خيرا
السلام عليكم
ردحذفالحكمة لغةً: هي السداد والإصابة في الشيء نقول أحكمت إغلاق الباب وأحكمت إغلاق القنينة...يعني تمكنت من ذلك.
الحكمة عند اليونان هي الفلسفة وقد شرح فتاغورس كلمة فلسفة بمعنى أنها محبة الحكمة والفيلسوف هو محب الحكمة، ذلك لأن الحكمة لا يملكها أحد فسماهم بالذي يحب الحكمة...هذا من وجهة نظر الفلسفة.
الحكمة في الإسلام كما تفضلت تأتي من عندي الله تعالى وهي هبة، وهناك من الأيات القرآنية التي ذكرت فيها الحكمة بمعنى السنة كقول الله تعالى:" يعلمهم الكتاب والحكمة ويزكيهم" أكثر المفسرون ذهبوا إلى أنها السنة.
هذه إضافتي وشكرا.
الموضوع فوق الرائع بجد
ردحذفومش عارفه اعلق
لان اوقات الصمت بيكون حكمه
انا كمان مقصر في الناحية دي
ردحذفربنا يحفظنا ويكرمن بمعرفة صحيحة للاسلام
خالص تحياتي
موجة
متشكره لكم جميعا يا جماعه
ردحذفهوبتي وموجه ابو حسام الدين والارموطي
وام خلود والازهري
وعبدالله المصري
كلكم نورتوني
واسفه انى ما رديت الا دلوقتي ما خدتش بالي ان فى تعليقات جديده
بجد ماشاء الله عليكى
ردحذفماشاء الله كلماتك كلها مفيدة جداااااااا وجميلة ربنا يفقهك فى الدين اكتر واكتر ويعطينا مثلك يارب
ربنا يوفقك ويجازيكى كل خير