الاثنين، 2 أغسطس 2010

تارك الصلاة

لحقيقه انا زعلانه اوي يا جماعه انى ما بقيتش اكتب فى المدونه الاسلاميه زي زمان

وبصراحه اكتر مش عارفه اكتب

لان تخيلوا كل ما اجي انوي اتكلم فى موضوع الاقي نفسي باقول بلاش ده لانه موضوع خلافي وهايعملي صداع وانا مش عايزه صداع

غير انى قلبي واجعني من كتر الكلام الى باسمعه فى الدين لدرجة انى صدقا بقى عدي ياس من انى اتكلم

المهم مش هاطول عليكم

ندخل فى الموضوع
النهارده عايزه اتكلم معاكم شويه عن الصلاه

ايوه الى زهقنا كلام عنها  بس انا مش هازهق لانى للاسف الشديد لسه بقابل ناس ما بتصليش

دول مش بس ما بيصلوش  لا دول ما بيصلوش ومش حاسين كمان انهم عاملين مشكله يعنى

يعنى تلاقي الجدع من دول حلو كده طول بعرض ويقولك لا انتى فاكراني ايه ده انا كويس والله ولعلمك باعرف فى الدين كويس بس هى الصلاه بس كل ما احاول مافيش مش عارف انتظم

طيب انت عارف انك كده تبقى عاصي ؟؟

عاصي ؟؟ حرام عليكى ليه هو انا باعمل ايه

اصحح لك معلوماتك يا فالح العاصي هو الى ما بيعملش الفروض

انما مرتكب المحرمات هو الفاسق
حلو كده ؟؟

مش عايزه اسمع حد بيقول انا صحيح ما باصليش بس انا والله كويس ... مالهاش دعوه دي خالص ايه الكويس الى في كده مش فاهمه بنقولك انت عاصي

تخيلوا كده لو  عيل اهبل من اصحابك يا ريس ولا من اصحابك يا هبله بيرن عليك ولا بينده عليك من الشارع تقوم تجري جري زي الحصان ولا مكسل ولا مش قادر ولا ناسي ولا لما الفيلم يخلص ولا أي حاجه

طب الاذان ؟؟ الاذان بياذن يا بهوات وتلاقيهم جلدهم سمكه 20 سم على الاقل ولا أي احساس

الاذان نداء ربنا

بذمتك ودينك لو كان اخوك الصغير ولا ابنك  تنده عليه ما يردش تكلمه ولا معبرك
تدخل تلاقيه قاعد فى اوضتك ونازل فيها تخريب وتكسير وبهدله كنت تعمل فيه ايه
اظن اقل حاجه هاتعمله كوفته
وجايز همبورجر

طيب ربنا بينده عليك يا راجل وانت قاعد الله اعلم بقى بتتفرج على كليب كده ولا كده ولا بتفكر ازاي تقلب ابوك فى قرشين  ولا بتبعت بلوتوث لبنت الجيران

وهكذاااااااااا

وكمان ما تردش وما تصليش

كتير الاقي حد بيقولي اصلي ؟؟ اصلي ايه ما ينفعش ده انا باعمل وباعمل
اقوله طب معلش يا سيدى خدنى  علىا د عقلي وصلي

واقوله تنهاك صلاتك عن الفحشاء والمنكر ان شاء الله

او الاقي حد تاني عبيط بيقولي  خلاص يعنى الى بيصلوا ملايكه ما فلان بيصلي كل فرض فى الجامع ومربيلى دقنه اد كده وهو حرامي

طب ياعم انت تلاقي حمار بينهق فى الشارع تنهق معاه
ما الكفار بياكلوا ما ناكلش احنا بقى

عارفين انا باعتبر الصلاه دي هى القلم الى بياخدوا الشيطان  خمس مرات فى اليوم

باحس الناس الى مش بتصلي  الشيطان متمكن منها
الشيطان راكب على كتافهم

الشيطان لما ياخد قلم خمس مرات فى اليوم على الاقل هيبعد شويه ولو نص اليوم يعنى

بعدين تقولي الشيطان مش بيخلينى اصلي وانت اصلا مش محتاج الشيطان فى حاجه طول ما انت ما بتصليش تلاقيك ماشي فى سكته من غير ما يقول روح

وبعدين لما تلاقي الشيطان بيقولك ياعم لسه بدري على الصلاه يا سيدى يعنى هو الايمان بالصلاه الايمان فى القلب وحياتك
قوم مديله قلمين الى هو تستغفر وتصلي ولو عايزه يتفقع منك صلي السنه كمان

وما تقولش انا حاولت ومش عارف
حاولت  انتظم ومش عارف

لا اصبر على نفسك يا اخي الفاضل
اصبر على معصيتك واعرف ان ربنا قادر  على كل شيء
بس نجتهد
بس نؤمن
بس من قلبنا نكون عايزين نصلي فعلا وننتظم
وندعوا ربنا يتوب علينا ويثبتنا على الصلاح


ارجوكم اينما كنتم ومهما فعلتم ومهما كانت ظروفكم وافكاركم صلوا بس

صلوا وبعدين نتفاهم فى الباقي
ممكن ؟؟؟
ومش عايزه تلاكيك من نوع اصل الوقت اصل الشغل  اصل الدروس اصل المحاضرات اصل الهبل مافيش الكلام ده الى عايز يصلي بيصلي  ... مااااشي مش عايزه اي استهبال فى النقطه دي
            فاضل اقولكم شوية احاديث انا عارفه انكم حافظينها بس التذكره حلوه

قال النبي صلى الله عليه وسلم (أول ما يحاسب  به العبد يوم القيامة من عمله الصلاة فأن صلحت فقد أفلح وأنجح وأن نقصت فقد خاب وخسر) (أخرجه الترمذى)

قال رسول الله صلى الله عليه وسلم أرايتم إن كان أمام بيت أحدهم نهر فاغتسل منه خمس مرات كل يوم أيبقى من درنه شيء قالوا لا قال:كذلك الصلاة فإنها تمحى الذنوب صدق رسول الله
وخلي بالكم المقصود هنا بالاغتسال من النهر مش عشان الوضوء عشان اكتشفت ان فى ناس فاهمه كده لا وانما اغتسال المصلي من الذنوب بصلاته
اظن ما حدش فينا مش محتاج يغسل ذنوبه
طبعا الاحاديث كتير اوي اوي
لكن مش عايزه اطول عليكم اكتر من كده

والايات كمان الى اتكلمت عن الصلاه كتيره جدا جدا
منهم الايه دي الى انا باحبها اوي اوي

قال تعالى( يوم يكشف عن ساق ويدعون إلى السجود فلا يستطيعون(42) خاشعة أبصارهم ترهقهم   ذله وقد كانوا يدعون إلى السجود وهم سالمون(43)

ودي برضه مجموعه من الايات

قال الله تعالى( فخلف من بعدهم خلف أضاعوا الصلاة واتبعوا الشهوات فسوف يلقون غيا (59)  الا من تاب وامن وعمل صالحا ثم اهتدى(60))
غيا دي وادي فى جهنم اعاذنا واياكم الله
وقال تعالى فى سورةالبقره45 (واستعينوا بالصبر والصلاةوانها لكبيرة الا على الخاشعين )

وقال تعالى فى سورة المائده(انما يريد الشيطان أن يوقع بينكم العداوة والبغضاء فى الخمر والميسر ويصدكم عن ذكرالله وعن الصلاة فهل انتم منتهون(91)
واخيرا هاختم بالحديث ده لكل من فاته صلاه
قال صلى الله عليه وسلم من نام عن  صلاة او نسيها فكفارتهاان يصليها اذا ذكرها لا كفارة لها الا ذلك .

واتمنى ما اكونش طولت وتقلت عليكم
لكن ارجوكم صلوا
الى ما بيصليش يصلي
والى عنده ابن او ابنه صغير يعلمه الصلاه من وهو صغير
ودايما يعلمه ان الصلاه دي اهم من كل حاجه
من المسلسل ومن النت ومن المذاكره ومن كل حاجه
وطبعا ما يقولش لابنه صلي ويكون هو ما بيصليش او هى ما بتصليش
الطفل بيقرا الرسائل الغير مباشره اسرع واعمق

نفعنا الله واياكم بصالح الاعمال

الأحد، 22 نوفمبر 2009

الحكمة


السلام عليكم


مقصره فى حق الرؤيه الاسلاميه وبانب فى نفسي بقالي كتير والله

بس غصب عني موضوعات الرؤيه بتحتاج شغل شويه ووقت


نشوف النهارده بقى هانتكلم عن الحكمه ان شاء الله وهانقول ايه :


يؤتي الحكمة من يشاء ومن يؤت الحكمة فقد اوتي خيرا كثيرا وما يذكر الا اولوا الالباب
سورة البقرة- آية 269


حبيت ابدأ الموضوع بالاية الكريمه دي والى فيها معن جميل اوي لمن يتأملها
مكانة الحكمة

طيب اولا يعنى ايه حكمه :
الحكمة المعرفة الجيده بالأمور وفهمها كما يجب والراي الصائب والمقدره على وضع الأمور في نصابها الصحيح والتحدث بما هو صحيح والعمل به فعلا .


يا ترى اية هي مكانة الحكمه فى القرآن وعند ربنا سبحانه وتعالى وايه اهميتها ؟


شايفين الايه فوق بتقول ايه ؟


بتقول يؤتي الحكمة من يشاء


بتتكلم عن الحكمه على اساس انها هبه وعطيه من الله سبحانه وتعالى
بس شوفوا اتبعت بايه ومن اوتي الحكمه فقد اوتي خيرا كثيرا

طيب وباقي النعم الى ربنا اعطاهالنا ؟؟


شوفوا كده الايه دي

وَمَا أُوتِيتُم مِّن شَيْءٍ فَمَتَاعُ الْحَيَاةِ الدُّنْيَا وَزِينَتُهَا وَمَا عِندَ اللَّهِ خَيْرٌ وَأَبْقَى أَفَلا تَعْقِلُونَ


كل حاجه حلوه ربنا ادهالك من متاع الدنيا وزينتها يبقى دائما صغير لما نقارنه بما هو عند الله

طيب والايه دي

المال والبنون زينة الحياة الدنيا والباقيات الصالحات خير عند ربك ثوابا وخير املا


برضه نفس المعنى تقريبا

طيب والملك والسلطان والعز ؟؟؟


قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شيء قدير


خير قال ربنا انه انه خير بايد ربنا

انما الحكمه ؟


خيرا كثيراااااااا


يؤتي الحكمة من يشاء ومن يؤت الحكمة فقد اوتي خيرا كثيرا وما يذكر الا اولوا الالباب
سورة البقرة- آية 269

بس ايه ؟
وما يذكر الا اولوا الالباب



طيب خلونا نستعرض ورود كلمة الحكمه فى القرآن ونعرف مكانتها اكتر


الحكمه ذكرت فى القران كثيرا ولكن فى الاغلب كان ذكرها مرتبط بحاجتين الانبياء و الكتب السماويه

ولكن فى غير اقتصار عليهم فهو يؤتي الحكمه من يشاء مش الانبياء فقط يعنى


هانشوف ده من خلال الايات

الايه دي على سبيل المثال :

لقد من الله على المؤمنين اذ بعث فيهم رسولا من انفسهم يتلو عليهم اياته ويزكيهم ويعلمهم الكتاب والحكمة وان كانوا من قبل لفي ضلال مبين
سورة آل عمران - آية 164



الحكمه اقترنت بالكتاب ( السماوي )فى القرآن بالظبط 9 مرات ودي مكانه واضحه للحكمه



خلينا نشوف كمان ذكرت الحكمه فين واعتبرت فضل الله تعالى على انبياؤه

لما نتكلم عن داود فى الايتين دول

فهزموهم باذن الله وقتل داود جالوت واتاه الله الملك والحكمة وعلمه مما يشاء البقرة


وشددنا ملكه واتيناه الحكمة وفصل الخطاب سورة ص


وزي ما قرن الحكمه مع الكتاب والنبوه دايما فى الايات الى اتكلمنا عنها
في الايه دي ومع داود قرن بينها و الملك

لا مش الملك بس الملك القوي الشديد الى ربنا قواه فعلا ليصبح ملك عظيم الى هو كان ملك داود عليه السلام

وربنا كمان وهبه ايه بعد الملك القوي الحكمة اصلها حاجه مهمه اوي وكبيره اوي

وفصل الخطاب : الى هو تمييز الكلام الصح من الخطأ والتحكيم بين الناس برضه ياريت نلاحظ المكانه دي لفصل الخطاب



شوفوا كمان الحكمه جائت على لسان عيسى عليه السلام ازاي

ولما جاء عيسى بالبينات قال قد جئتكم بالحكمة ولابين لكم بعض الذي تختلفون فيه فاتقوا الله واطيعون الزخرف




كمان خلينا نشوف كمان الايه دي


ذلك مما اوحى اليك ربك من الحكمة الاسراء

ودي كانت بعد اوامر الاهيه طووويله كلنا يمكن نعرفها بداية من

وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا

وباقي قائمة الأوامر الى وردت فى الايه دي

وختمت الأوامر أو النصائح بانها وحي بالحكمه من الله عز وجل

ودي المكانه الى بتوضع فيها الحكمه دايما من الله

دايما ربنا بيتكلم عن الحكمه على انها هبه عظيمه الشأن يهبها لعباده الصالحين زي الهبه الى ربنا بعتها للقمان


ولقد اتينا لقمان الحكمة ان اشكر لله ومن يشكر فانما يشكر لنفسه ومن كفر فان الله غني حميد لقمان


اغنانا وغناكم الله من فضله ان شاء الله

نسأل الله تعالى ان يرزقنا الحكمه واياكم


واتمنى اكون افدتكم فعلا


وما اكونش طولت عليكم

السبت، 3 أكتوبر 2009

قصة خلق آدم عليه السلام (عرض باور بوينت للاطفال)




السلام عليكم




جايبالكم النهارده حاجه خفيفه كده وجميله




هديه مني لولادكم وحبايبكم وعايزه اعرف رايكم كده ايه




عشان اكمل السلسله ولا ايه




هو عرض باور بوينت لقصة خلق آدم عليه السلام




الكتابه مش ليا لاستاذنا عبد الحميد جوده السحار




لكن انا الى عملته داخل باور بوينت واتمنى انه يعجبكم ان شاء الله




انا رفعته على الوصله دي حملوه من هنا




وابقوا قولولي رايكم بقى

الأحد، 30 أغسطس 2009

مبطلات الصوم



سلام عليكم
بما اننا فى رمضان وكل سنه وانتم طيبين انا قلت اكتبلكم بعض احكام الصيام الى ممكن تنفعكم ان شاء الله فى رمضان

انا كنت قبل كده اتكلمت عن رمضــــان و الصيـــام

وان شاء الله النهارده نتكلم عن مبطلات الصوم


هانقسم مبطلات الصوم الى قسمين


الاول : وهو ما يبطل الصوم ويوجب القضاء فقط (يعنى يصوم يوم بدل اليوم ده بعد رمضان )
وهو


1-الاكل والشرب عمدا


لان طبعا لو كان ناسي ليس عليه كفاره بيكلم يومه عادي


زي ما قال رسول الله صلى الله عليه وسلم
من أكل ناسيا ، وهو صائم ، فليتم صومه ، فإنما أطعمه الله وسقاه
الراوي: أبو هريرة المحدث: البخاري - المصدر: صحيح البخاري - الصفحة أو الرقم: 6669خلاصة الدرجة: صحيح

2- القيء عمدا:

لو كان القيء غصب عنه لا يوجب القضاء ولا يبطل الصوم اصلا وبيتم صومه عادي
انما لو كان القيء عمدا يبطل الصوم ويوجب القضاء
لان الرسول عليه الصلاة والسلام قال
من استقاء عامدا فعليه القضاء ومن ذرعه القيء فلا قضاء عليه
الراوي: أبو هريرة المحدث: ابن العربي - المصدر: عارضة الأحوذي - الصفحة أو الرقم: 2/179خلاصة الدرجة: صحيح

3- الحيض والنفاس : ولو حاضت المرأه مثلا قبل الغروب بدقيقه فيبطل صيامها وتعيد اليوم تاني مع باقي ايام الحيض طبعا او النفاس

4- الاستمناء : بشرط يكون الشخص عمد الى ذلك . يعنى استمنى بالقصد وسعى اليه . اما اذا حصل الانزال بدون اي تدخل منه بحلم مثلا او حتى لمجرد النظر فده لا يبطل الصوم ولا يوجب شيء وكذلك المذي لا يبطل الصيام .

5- اي شيء ينزل الجوف عمدا حتى لو لم يكن طعام ده يبطل الصوم ويوجب القضاء


6- من نوى الفطر : حتى لو ما فطرش فعلا لكن نوي انه يفطر كده راح عليه صيام اليوم ده ويجب عليه القضاء لان النيه ركن من اركان الصيام
7- اذا اكل او شرب او جامع ويظن ان المغرب حان او ان الفجر لم يأذن بعد فعليه القضاء عند جمهور العلماء
(الا ان فى بعض الاراء بتقول انه مافيش عليه قضاء كمان وده لو ادخلنا ده تحت بند السهو والخطأ المرفوع عننا )


ثانيا : ما يبطل الصوم ويجب القضاء والكفاره


وحاجه واحده بس الى توجب ده عند جمهور الفقهاء وهو الجماع فى نهار رمضان


وخلينا نقول موقف مع الرسول نفهم منه الموضوع


جاء رجل إلى رسول الله صلى الله عليه وسلم فقال : هلكت ، فقال : ( وما ذاك ) . قال : وقعت بأهلي في رمضان ، قال : ( تجد رقبة ) . قال : لا ، قال : ( فهل تستطيع أن تصوم شهرين متتابعين ) . قال : لا ، قال : ( فتستطيع أن تطعم ستين مسكينا ) . قال : لا ، قال : فجاء رجل من الأنصار بعرق - والعرق المكتل - فيه تمر ، فقال : ( اذهب بهذا فتصدق به ) . قال : أعلى أحوج منا يا رسول الله ؟ والذي بعثك بالحق ، ما بين لابتيها أهل بيت أحوج منا ، ثم قال : ( اذهب فأطعمه أهلك ) .
الراوي: أبو هريرة المحدث: البخاري - المصدر: صحيح البخاري - الصفحة أو الرقم: 6710خلاصة الدرجة: [صحيح]


دي الروايه بالنص نحكيها بقى بالراحه عشان نفهمها


واحد راح للرسول عليه الصلاة والسلام وقاله الحقنى انا جامعت زوجتي فى رمضان
فقال له الرسول ان يعتق رقبه عبد من العبيد او يصوم شهرين متتابعين او يطعم ستين مسكينا
لكن الرجل قال انه ما يقدرش يعمل كل ده
فالرسول اعطاه عرق بلح ( العرق يعنى 15 صاع والصاع ده مكيال زي الكيلو وكده ما علينا ) قاله اتصدق به

فالرجل قاله مافيش حد فى المدينه كلها افقر مننا
فالرسول ضحك وقاله اطعمه اهل بيتك .

الحديث ده فيه نقط مهمه جدا
اولا: حكم من جامع زوجته فى نهار رمضان هو القضاء والكفاره والكفاره الى هى عتق رقبه او صيام شهرين متتاليين او اطعام ستين مسكينا

ثانيا : سقوط الكفاره عن الشخص الى فعلا مش قادر عليها (الا ان فى بعض الاراء برضه بتخالف الراي ده)

ثالثا : هو ان هل الكفاره تجب على الزوجه كمان ؟
الحقيقه الموضوع فيه الرايين
فى راي بيقول لو كانت الزوجه مجبره فلا عليها كفاره ولكن عليها القضاء وانما لو كانت مختاره ومتعمده هى كمان تجب عليها ايضا القضاء والكفاره

وفى راي تاني بيقول ان مجبره كانت اولا فهما الاثنين عليهم كفاره واحده بيقضيها الزوج وده راي الشافعي واستناده للحديث السابق حيث ا ن الرسول لم يشير الى ان الزوجه كمان عليها كفاره .

ويارب اكون انا كلامي سهل عليكم وما اكونش طولت عليكم وافدتكم فعلا و كل سنه وانتم طيبين وربنا يتم عليكم رمضان بالخير ان شاء الله

والمره الجايه ان شاء الله هانتكلم عن احكام قضاء رمضان


اه وعلى فكره مرجعي فى الموضوع ده هو كتاب فقه السنه للسيد سابق لو حد حب يقرا اكتر


الجمعة، 3 يوليو 2009

آية الزواج



فى الحقيقه يا جماعه انا اخترت النهارده اتكلم عن الزواج

مش من الناحيه الشرعي ولا احكامه ولا كل ده انما من جانب مختلف ورؤيه شخصيه زي ما انتم عارفين طريقتى

الزواج ده نظام اجتماعي قننه الشرع
يعنى ايه ؟يعنى اساسا الزواج كان موجود من قبل الاسلام لكن كان فى اخطاء وعادات كتير غلط وجه الاسلام حط قوانين للنظام الاجتماعي ده ونظمه .

طيب بعد اذنكم عايزه اتكلم من خلال الايه دي شويه


ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة ان في ذلك لايات لقوم يتفكرون
سورة الروم - سورة 30 - آية 21

معلش ركزوا بقى معايا وتعالوا ناخدها حته حته


ومن آيته ان خلق لكم من انفسكم ازواجا : الايه معتبره فكرة وجود ازواج دي آيه من ايات الله فى خلقه معجزه يعنى (والازواج هنا من الجنسين يعنى )


ازواجا لتسكنوا اليها : شوفوا السبب من وجود الازواج ايه السكنــــى


يعنى ايه سكنى : لما نقول سكن الشيء يعنى استقر مكانه السكنى هنا استقرار واطمئنان وهدوء نفسي


وجعل بينكم مودة ورحمه : هنا بقى الحقيقه انا وقفت قدام الكلمه دي شويه كده شمال ويمين وكلمة جعل خصوصا
بنلاقيها دايما مذكوره فى القرآن مع المسلمات والافعال الالهيه زي وجعلنا الارض مدادا .... مثلا


والايه دي كمان حتى فى اقران بين خلق السموات والارض والازواج على اعتبار ان وجود الازواج منحه الاهيه برضه

فاطر السماوات والارض جعل لكم من انفسكم ازواجا
سورة الشورى - سورة 42 - آية 11

نرجع للايه الاولى بتاعتنا
وجعل بينهم موده ورحمه .... وكانها منحه الاهيه .. الى هى ايه المنحه ؟ الموده والرحمه
يعنى دي موجوده بامر الله بس احنا الى مش بنقدرها ولا بنراعيها ابدا احنا بنهملها جايز بننساها بنبوظها اي حاجه بقى
الموده والرحمه : والله العظيم موده ورحمه مش خناق وعراك ومحاكم وحرب اهليه فى البيوت

وفى نهاية الايه بقى بيقول : ان فى ذلك لايات لقوم يتفكرون


يتفكرون عشان خاطري تتفكرون شويه وتعرفوا يعنى ايه زواج وعشان ايه



وفى ايه تانيه برضه ذكر فيهاالزواج لكن تعالوا نقرا الايه كده وقلولي حاسين ايه من معناها

والله جعل لكم من انفسكم ازواجا وجعل لكم من ازواجكم بنين وحفدة ورزقكم من الطيبات افبالباطل يؤمنون وبنعمت الله هم يكفرون
(5)
سورة النحل - سورة 16 - آية 72

الايه بتعد بعضا من نعم ربنا عليكم الى المفروض نشعر بها بالامتنان لله عز وجل
شايفين عدوا كده


جعل لكم من انفسكم ازواجا


ومش بس كده كمان من ازواجكم رزققكم اولاد


ومن الاولاد احفاد


خلاص بيقيتوا قبيله ؟


طيب ورزقكم بالطيبات كمان عشان تعيشوا وتستمتعوا بحياتكم
وبعد ما ربنا عد لنا جزء من نعمه


الايه بتسالنا بعد كله ده وبتعجب : افبالباطل يؤمنون وبنعمت الله هم يكفرون


شايفين القرآن ازاي بيصور الزواج والازواج كنعمه من نعم ربنا علينا ؟


واحنا من اول ما يقابلنا مشكله فى حياتنا نقعد نردد الاسطوانه اياها بتاعة يجى الى عايز يتجوز يشوف
ما كنا حلوين بلا جواز بلا قرف
وكلمه بيقولها جايز بهزار وجايز بجد
وجايز فى وقت هو فيه مضايقه
اوعى تتجوز يا ابنى خليك كده فى هوى نفسك بلاش وجع قلب ادينى باقول يا ريت الى جرى ما كان
وهى تقول ما تستعجليش يا اختي على الجواز بكره تتجوزي وتقولي ولا يوم من ايام بيت اهلي تروحي تجيبى واحد يتحكم فيكى ويقرفك
لييييييييييه مين بس قال كده
جايز المتجوزين بيقولوا الكلام ده كده هزار جايز جد جايز هما فاشلين فى حياتهم
بس حرام عليهم ومش من حقهم ابدا يسودوا الدنيا فى عين الشباب
عشان فعلا الكلام ده بياثر عليهم وحقيقى بقت مشكلة العنوسه تكاد تكون فى حالات كتير هى عزوف عن الزواج مقنع غير العزوف الصريح كمان ودي مشكله كبيره بيتولد منها مشاكل اكبر وابشع لاتخفى على حد ابدا


الرسول عليه الصلاة والسلام قال :
الدنيا متاع . وخير متاعها المرأه الصالحه .
رواه مسلم عن عبد الله بن عمرو بن العاص


وقال كمان

ثلاث من السعادة ، و ثلاث من الشقاوة ، فمن السعادة : المرأة تراها تعجبك ، و تغيب فتأمنها على نفسها و مالك ، و الدابة تكون وطيئة فلتلحقك بأصحابك ، و الدار تكون واسعة كثيرة المرافق و من الشقاوة المرأة تراها فتسوؤك ، و تحمل لسانها عليك ، و إن غبت عنها لم تأمنها على نفسها و مالك ، و الدابة تكون قطوفا ، فإن ضربتها أتعبتك ، و إن تركتها لم تلحقك بأصحابك ، و الدار تكون ضيقة قليلة المرافق


الراوي: سعد بن أبي وقاص المحدث: الألباني - المصدر: السلسلة الصحيحة - الصفحة أو الرقم: 1047خلاصة الدرجة: حسن



اقروا الحديث ده وحاولوا توصلوا للثلاث حاجات الى فيه او بعضهم واحمدوا ربنا واشكروا فضله ولو لقيتوا نفسكم مش سعداء يبقى المشكله فيكم بقى


ولو ما قدرتوش توصلوا لهم جميعا برضه احمدوا ربنا واشكروا فضله واسعوا فى مناكبها لحد ما ربنا يرزقكم
وربنا يكرمكم جميعا ويوسع عليكم ويرزقكم الازواج الصالحين لو ما كانش عندكم
ويبارك لكم ويصلح ما بين اديكم لو كان عندكم ازواج


شكرا لكم ويارب ما اكونش تقلت عليكم

الأحد، 14 يونيو 2009

حكم الشذوذ الجنسي فى الاسلام



السلام عليكم
فى الحقيقه من فتره دخلت مدونه اخت كريمه اتكلمت عن مشكلة المثليه الجنسيه فى الاناث
او زي ما انا باحب اعبر عنها الشذوذ الجنسي


وفى الحقيقه اهالني ردود الناس الى بعضه قال ان مافيش نص بتحريم السحاق
حتى ان الاخت الكريمه المدونه كمان قالت انها بتقر ان السحاق حرام ولكن مافيش نص بتحريمه


فى الحقيقه انا طبعا حبيت ادور فى الموضوع اكتر وان كنت عارفه فعلا ما ورد فيه لكن برضه للتاكيد وقبل ما اتكلم فيه
واتفضلوا معايا نشوف الى انا وصلت له



اولا وباديء ذي بدئ احنا اساسا محرم علينا النظر لعورات بعض بموجب الحديث ده

لا ينظر الرجل إلى عورة الرجل . ولا المرأة إلى عورة المرأة . ولا يفضي الرجل إلى الرجل في ثوب واحد . ولا تفضي المرأة إلى المرأة في الثوب الواحد . وفي رواية : مكان عورة عرية الرجل وعرية المرأة .
الراوي: أبو سعيد الخدري المحدث: مسلم - المصدر: المسند الصحيح - الصفحة أو الرقم: 338خلاصة الدرجة: صحيح

وده النظر فقط فما بالك اللمس والاستمتاع وما الى ذلك من الافعال المحرمه الى بيتضمنها السحاق او اللواط كمان

النقطه الى بعد كده فى الحقيقه فى آيه فى القرأن تحديدا فى سورة النساء
الى هى الايه دي

وَالَّلاتِي يَأْتِينَ الْفَاحِشَةَ مِن نِّسَائِكُمْ فَاسْتَشْهِدُواْ عَلَيْهِنَّ أَرْبَعَةً مِّنكُمْ فَإِن شَهِدُواْ فَأَمْسِكُوهُنَّ فِي الْبُيُوتِ حَتَّىَ يَتَوَفَّاهُنَّ الْمَوْتُ أَوْ يَجْعَلَ اللَّهُ لَهُنَّ سَبِيلاً

واعقبتها على طول الايه دي

وَاللَّذَانَ يَأْتِيَانِهَا مِنكُمْ فَآذُوهُمَا فَإِن تَابَا وَأَصْلَحَا فَأَعْرِضُواْ عَنْهُمَا إِنَّ اللَّهَ كَانَ تَوَّابًا رَّحِيمًا



والحقيقه انا طول عمري اقرا الايه دي وعندي قناعه شخصيه ان المقصود بها السحاق واللواط لان الايتين حكمهم مختلف ووردت للمؤنث على حده وللمذكر على حده وعليه انا شايفه ان المقصود بها كده



الا ان فى اراء تانيه بتقول ان ده كان حكم تدريجى للزنا



والحقيقه انا باقول اينعم هو كان حكم تدريجى للزنا لكن برضه على اد فهمي انا قلت فى البدايه هنا حرم السحاق وفعل قوم لوط


لانهم اساسا مرفوضين من المجتمع عموما لانهم ضد الفطره ومهما قال دعاة الحريه هايفضل المجتمع نفسه رافض الفكره واي مجتمع على فكره حتى المجتمع الامريكى



فهنا انزل التحريم للسحاق وفعل قوم لوط



واعقبه بعد كده تحريم الزنا كمان بين رجل وامرأه
وقريت راي عجبنى جدا
نشوفه مع بعض

يقول فضيلة الشيخ السيد سابق في كتابه القيم «فقه السنة ج 2» في باب الحدود:
ونرى ان الظاهر ان آيتي النساء 15/16 تتحدثان عن حكم السحاق وفعل قوم لوط وحكمهما يختلف عن حكم الزنى المقرر في سورة النور، والمعنى اي النساء اللاتي يأتين الفاحشة وهي السحاق الذي تفعله المرأة مع المرأة فاستشهدوا عليهن اربعة من رجالكم فإن شهدوا بالواقعة فاحبسوهن في البيوت بأن توضع المرأة وحدها بعيدة عمن كانت تساحقها حتى تموت او يجعل الله لهن سبيلا الى الخروج بالتوبة او الزواج المغني عن المساحقة



بالنسبه لمن ياتون فعل قوم لوط فامره محسوم كما ورد فى الحديث الصحيح

من وجدتموه يعمل عمل قوم لوط فاقتلوا الفاعل والمفعول به

الراوي: - المحدث: الإمام أحمد - المصدر: تنقيح تحقيق التعليق - الصفحة أو الرقم: 3/302خلاصة الدرجة: صحيح


وبالنسبه للسحاق هو حرام لا محاله ولكن لا يقام عليهم الحد ولا عقوبتهم القتل



ولكن ما ننساش ابدا ان القرآن وصف الفعله دي بالفحش
وشوف قال القرأن ايه عن الفحش اعاذنا واعاذكم الله

قل انما حرم ربي الفواحش ما ظهر منها وما بطن والاثم والبغي بغير الحق وان تشركوا بالله ما لم ينزل به سلطانا وان تقولوا على الله ما لا تعلمون
(10)

سورة الأعراف - سورة 7 - آية 33


اعاذنا واعاذكم الله من الفاحشه واهلها



وشوف كمان الايتين دول والى وردوا بعد الآتين الى فاتوا فى سورةالنساء شوف الايه وجمالها بتقول ايه

إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِن قَرِيبٍ فَأُولَئِكَ يَتُوبُ اللَّهُ عَلَيْهِمْ وَكَانَ اللَّهُ عَلِيمًا حَكِيمًا
وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّى إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الآنَ وَلاَ الَّذِينَ يَمُوتُونَ وَهُمْ كُفَّارٌ أُوْلَئِكَ أَعْتَدْنَا لَهُمْ عَذَابًا أَلِيمًا


بمعنى ان حتى من وقع فى المعصيه له منفذ


لنا التوبه الى الله تعالى ارحم الراحمين نقف على بابه دون كلل او ملل فان فتح بابه كنا اول المقبولين




انا اتكلمت باختصار شديد عن الموضوع لانى مش عايزه ادخل فى كلام كتير

وطبعا العقوبات الى اتكلمنا عليها دي فى حال ان الحالات فرديه انما فى حال شيوع الفاحشه الموضوع بيكون مختلف عشان كده الحكم متروك مفتوح للقاضي

يعنى مثلا فى قوم لوط والى هلكوا جميعا نساءا ورجال ويقال ان كان نسائهم يمارسون السحاق ايضا
فربنا اهلكهم جميعا اعاذنا الله واياكم



وفى النهايه يا اخواني احب ا نبه الى ان الفطره الى ربنا فطرنا عليها ما نقدرش نغيرها ولو غيرناها فى هلاك على المستوى الشخصي والعام كمان وعلى المستويين قصير المدى وبعيد المدى



وارجوكم ناخد بالنا من الاطفال خصوصا فى فترة الطفوله المتاخره لانها فترة تشكل الميول والاتجاهات واي تشوهات فى الفتره دي سواء بالصحبه السيئه للاطفال او بالاعتداء الجنسي بتكون هى السبب فى انحرافات السلوك الجنسي فيما بعد
وكمان يرحمكم الله نعمل زي ما قال بن حنبل اظن :
نفسك .. انم لم تشغلها بالحق شغلتك بالباطل



ونستعين بالصبر والصلاه
والصيام والعباده يا اخواني
واوصيكم ونفسي بتقوى الله
ارجو ان اكون اضفت لكم وافدتكم فعلا

السبت، 30 مايو 2009

فضل الوضوء

السلام عليكم



النهارده حبيت اكلمكم عن فرض مهم جدا

وهو الوضوء

الوضوء مرتبط بالصلاه عندنا وكتير بنتكلم عن الصلاه وفضلها وحكمها وحكم تاركها

وان شاء الله لسه هانتكلم هنا عنها كتير

لكن النهارده انا حبيت اعرفكم اد ايه الوضوء ده مهم وجميل ورحمة من ربنا

الوضوء الى هو فرض ما بياخدش دقيقتين

واد ايه له فضل فعلا عظيم



تعالوا كده نشوف الرسول عليه الصلاة والسلام قال عنه ايه:



إذا توضأ العبد المسلم ( أو المؤمن ) فغسل وجهه ، خرج من وجهه كل خطيئة نظر إليها بعينيه مع الماء ( أو مع آخر قطر الماء ) فإذا غسل يديه خرج من يديه كل خطيئة كان بطشتها يداه مع الماء ( أو مع آخر قطر الماء ) فإذا غسل رجليه خرجت كل خطيئة مشتها رجلاه مع الماء ( أو مع آخر قطر الماء ) حتى يخرج نقيا من الذنوب .

الراوي: أبو هريرة المحدث: مسلم - المصدر: المسند الصحيح - الصفحة أو الرقم: 244

خلاصة الدرجة: صحيح

سبحان الله الحديث ده بيقول ان الوضوء مش بس طهاره ونضافه للبدن وانما كمان نظافه من الذنوب اعتقد الواحد لو حس كده وهو بيتوضى انه بيغسل نفسه من الذنوب عمره ما هايكروت الوضوء



نشوف الحديث ده كمان اد ايه جميل



رقيت مع أبي هريرة على ظهر المسجد فتوضأ ، فقال : إني سمعت النبي صلى الله عليه وسلم يقول : إن أمتي يدعون يوم القيامة غرا محجلين من آثار الوضوء ، فمن استطاع منكم أن يطيل غرته فليفعل .

الراوي: أبو هريرة المحدث: البخاري - المصدر: الجامع الصحيح - الصفحة أو الرقم: 136

خلاصة الدرجة: [صحيح]

غر :يعنى مقدمة راسهم بيضاء (غره مقدمة الراس)

محجلين : يعنى قدمهم واسفل ارجلهم بيضاء



بجد الحديث ده انا باحبه جدا له ذكرى معايا جميله بعدين نبقى نرغي فيها

لكن اد ايه المشهد ده الواحد لما بيتخيله بيكون جميل ورائع جدا



حديث كمان



قال رسول الله صلى الله عليه وسلم :

ألا أدلكم على ما يمحو الله به الخطايا ويرفع به الدرجات ؟ " قالوا : بلى . يا رسول الله ! قال " إسباغ الوضوء على المكاره . وكثرة الخطا إلى المساجد . وانتظار الصلاة بعد الصلاة . فذلكم الرباط " .

الراوي: أبو هريرة المحدث: مسلم - المصدر: المسند الصحيح - الصفحة أو الرقم: 251

خلاصة الدرجة: صحيح



اسباغ الوضوء: معناه اكمال الوضوء واتقانه بوصول الماء لجميع اجزاء الوضوء وزياده شويه

على المكاره : بمعنى فى ظل المصاعب (زي المايه البارده مثلا والجو بارد )



فذلكم الرباط : بمعنى ان الى يلتزم بالحاجات الثلاثه دول الى ذكروا فى الحديث كده هو ده نعم جهاد النفس والمداومه على الطاعه .



مفهوم الحديث كده ؟؟





لفت نظري مره وانا كنت بادعبس كالعاده فى موضوع على النت تعليمات وارده من جهه صحيه مختصه بالتنبيه انه فى حالة وجودك فى مكان يحتمل فيه العدوى يعنى اعداد كتيره مثلا او كده وفى حال الامور عاديه حتى

فيفضل انك كل ما يتيسر لك تغسل وشك وايدك ورجلك وراسك الى هى الاعضاء الى باينه منك وانت ماشي فى الشارع على الاقل خمس مرات تجنبا لحدوث عدوى بسبب التجمعات او الاماكن المغلقه



طبعا جهه مالهاش دعوه بالاسلام اساسا ولا كانوا بيجاملونا يعنى



فى الحقيقه مش متخيله الناس الى ما بيصلوش بيعيشوا ازاي من غير وضوء ؟؟!!!



سبحانه كل حاجه فرضت علينا والله لها حكمه



اتمنى اكون افدتكم



وربنا ينفعنا وينفعكم بثواب صالح الاعمال