الاثنين، 2 أغسطس 2010

تارك الصلاة

لحقيقه انا زعلانه اوي يا جماعه انى ما بقيتش اكتب فى المدونه الاسلاميه زي زمان

وبصراحه اكتر مش عارفه اكتب

لان تخيلوا كل ما اجي انوي اتكلم فى موضوع الاقي نفسي باقول بلاش ده لانه موضوع خلافي وهايعملي صداع وانا مش عايزه صداع

غير انى قلبي واجعني من كتر الكلام الى باسمعه فى الدين لدرجة انى صدقا بقى عدي ياس من انى اتكلم

المهم مش هاطول عليكم

ندخل فى الموضوع
النهارده عايزه اتكلم معاكم شويه عن الصلاه

ايوه الى زهقنا كلام عنها  بس انا مش هازهق لانى للاسف الشديد لسه بقابل ناس ما بتصليش

دول مش بس ما بيصلوش  لا دول ما بيصلوش ومش حاسين كمان انهم عاملين مشكله يعنى

يعنى تلاقي الجدع من دول حلو كده طول بعرض ويقولك لا انتى فاكراني ايه ده انا كويس والله ولعلمك باعرف فى الدين كويس بس هى الصلاه بس كل ما احاول مافيش مش عارف انتظم

طيب انت عارف انك كده تبقى عاصي ؟؟

عاصي ؟؟ حرام عليكى ليه هو انا باعمل ايه

اصحح لك معلوماتك يا فالح العاصي هو الى ما بيعملش الفروض

انما مرتكب المحرمات هو الفاسق
حلو كده ؟؟

مش عايزه اسمع حد بيقول انا صحيح ما باصليش بس انا والله كويس ... مالهاش دعوه دي خالص ايه الكويس الى في كده مش فاهمه بنقولك انت عاصي

تخيلوا كده لو  عيل اهبل من اصحابك يا ريس ولا من اصحابك يا هبله بيرن عليك ولا بينده عليك من الشارع تقوم تجري جري زي الحصان ولا مكسل ولا مش قادر ولا ناسي ولا لما الفيلم يخلص ولا أي حاجه

طب الاذان ؟؟ الاذان بياذن يا بهوات وتلاقيهم جلدهم سمكه 20 سم على الاقل ولا أي احساس

الاذان نداء ربنا

بذمتك ودينك لو كان اخوك الصغير ولا ابنك  تنده عليه ما يردش تكلمه ولا معبرك
تدخل تلاقيه قاعد فى اوضتك ونازل فيها تخريب وتكسير وبهدله كنت تعمل فيه ايه
اظن اقل حاجه هاتعمله كوفته
وجايز همبورجر

طيب ربنا بينده عليك يا راجل وانت قاعد الله اعلم بقى بتتفرج على كليب كده ولا كده ولا بتفكر ازاي تقلب ابوك فى قرشين  ولا بتبعت بلوتوث لبنت الجيران

وهكذاااااااااا

وكمان ما تردش وما تصليش

كتير الاقي حد بيقولي اصلي ؟؟ اصلي ايه ما ينفعش ده انا باعمل وباعمل
اقوله طب معلش يا سيدى خدنى  علىا د عقلي وصلي

واقوله تنهاك صلاتك عن الفحشاء والمنكر ان شاء الله

او الاقي حد تاني عبيط بيقولي  خلاص يعنى الى بيصلوا ملايكه ما فلان بيصلي كل فرض فى الجامع ومربيلى دقنه اد كده وهو حرامي

طب ياعم انت تلاقي حمار بينهق فى الشارع تنهق معاه
ما الكفار بياكلوا ما ناكلش احنا بقى

عارفين انا باعتبر الصلاه دي هى القلم الى بياخدوا الشيطان  خمس مرات فى اليوم

باحس الناس الى مش بتصلي  الشيطان متمكن منها
الشيطان راكب على كتافهم

الشيطان لما ياخد قلم خمس مرات فى اليوم على الاقل هيبعد شويه ولو نص اليوم يعنى

بعدين تقولي الشيطان مش بيخلينى اصلي وانت اصلا مش محتاج الشيطان فى حاجه طول ما انت ما بتصليش تلاقيك ماشي فى سكته من غير ما يقول روح

وبعدين لما تلاقي الشيطان بيقولك ياعم لسه بدري على الصلاه يا سيدى يعنى هو الايمان بالصلاه الايمان فى القلب وحياتك
قوم مديله قلمين الى هو تستغفر وتصلي ولو عايزه يتفقع منك صلي السنه كمان

وما تقولش انا حاولت ومش عارف
حاولت  انتظم ومش عارف

لا اصبر على نفسك يا اخي الفاضل
اصبر على معصيتك واعرف ان ربنا قادر  على كل شيء
بس نجتهد
بس نؤمن
بس من قلبنا نكون عايزين نصلي فعلا وننتظم
وندعوا ربنا يتوب علينا ويثبتنا على الصلاح


ارجوكم اينما كنتم ومهما فعلتم ومهما كانت ظروفكم وافكاركم صلوا بس

صلوا وبعدين نتفاهم فى الباقي
ممكن ؟؟؟
ومش عايزه تلاكيك من نوع اصل الوقت اصل الشغل  اصل الدروس اصل المحاضرات اصل الهبل مافيش الكلام ده الى عايز يصلي بيصلي  ... مااااشي مش عايزه اي استهبال فى النقطه دي
            فاضل اقولكم شوية احاديث انا عارفه انكم حافظينها بس التذكره حلوه

قال النبي صلى الله عليه وسلم (أول ما يحاسب  به العبد يوم القيامة من عمله الصلاة فأن صلحت فقد أفلح وأنجح وأن نقصت فقد خاب وخسر) (أخرجه الترمذى)

قال رسول الله صلى الله عليه وسلم أرايتم إن كان أمام بيت أحدهم نهر فاغتسل منه خمس مرات كل يوم أيبقى من درنه شيء قالوا لا قال:كذلك الصلاة فإنها تمحى الذنوب صدق رسول الله
وخلي بالكم المقصود هنا بالاغتسال من النهر مش عشان الوضوء عشان اكتشفت ان فى ناس فاهمه كده لا وانما اغتسال المصلي من الذنوب بصلاته
اظن ما حدش فينا مش محتاج يغسل ذنوبه
طبعا الاحاديث كتير اوي اوي
لكن مش عايزه اطول عليكم اكتر من كده

والايات كمان الى اتكلمت عن الصلاه كتيره جدا جدا
منهم الايه دي الى انا باحبها اوي اوي

قال تعالى( يوم يكشف عن ساق ويدعون إلى السجود فلا يستطيعون(42) خاشعة أبصارهم ترهقهم   ذله وقد كانوا يدعون إلى السجود وهم سالمون(43)

ودي برضه مجموعه من الايات

قال الله تعالى( فخلف من بعدهم خلف أضاعوا الصلاة واتبعوا الشهوات فسوف يلقون غيا (59)  الا من تاب وامن وعمل صالحا ثم اهتدى(60))
غيا دي وادي فى جهنم اعاذنا واياكم الله
وقال تعالى فى سورةالبقره45 (واستعينوا بالصبر والصلاةوانها لكبيرة الا على الخاشعين )

وقال تعالى فى سورة المائده(انما يريد الشيطان أن يوقع بينكم العداوة والبغضاء فى الخمر والميسر ويصدكم عن ذكرالله وعن الصلاة فهل انتم منتهون(91)
واخيرا هاختم بالحديث ده لكل من فاته صلاه
قال صلى الله عليه وسلم من نام عن  صلاة او نسيها فكفارتهاان يصليها اذا ذكرها لا كفارة لها الا ذلك .

واتمنى ما اكونش طولت وتقلت عليكم
لكن ارجوكم صلوا
الى ما بيصليش يصلي
والى عنده ابن او ابنه صغير يعلمه الصلاه من وهو صغير
ودايما يعلمه ان الصلاه دي اهم من كل حاجه
من المسلسل ومن النت ومن المذاكره ومن كل حاجه
وطبعا ما يقولش لابنه صلي ويكون هو ما بيصليش او هى ما بتصليش
الطفل بيقرا الرسائل الغير مباشره اسرع واعمق

نفعنا الله واياكم بصالح الاعمال

هناك 27 تعليقًا:

  1. اسلوبك جميل في الددعوة ياندى غير منفر ويدخل القلب نفعنا الله واياك بما نسمع ونقرأ وجعلنا ممن يسمع القول ويعقله ويتبع أحسنه
    جزاك الله خيرا

    ردحذف
  2. حلو قوى اسلوب الدعوة للصلاه دة ... روح انت وهوه واللى مايروح مش حيحصل كويس ...اقدم لسيادتك رئيس قسم البلطجة فى الازهر .. السيدة ندى
    بجد بقى شويه : فعلا اسلوبك رائع ويارب يجعله فى ميزان حسناتك

    ردحذف
  3. جزاكي الله خيرا
    جزاكي الله خيرا
    جزاكي الله خيرا

    الف شكر ليكي

    سلام
    اختك خيخة

    ردحذف
  4. الحمد لله عل سلامة يا أم مريم بعد غييييييييييييييبة
    أني كنت جلت ان حضرتك طنشتي الرؤية بعد النجلة
    بس سلم يديكي
    ربنا يكرمك في مريم و خالد و رحمة

    تحياتي
    أبو شوشو

    ردحذف
  5. جميل الموضوع

    و جميل العرض و جميلة الحجج

    بجد تخلى الكل يفكر و يأخذ قرار

    ربنا يديكى و يجازيكى خيرا

    ردحذف
  6. خواطر مرسي يا جميل ربنا يخليكى

    نورتي
    جزانا واياكم الخير كله يارب

    ردحذف
  7. د اسلام

    اعمل ايه طيب ما انت عارف ما بينفعش معاهم غير كده
    ههههههههههههههههه

    متشكره اوي يا دوك وربنا يخليك

    ردحذف
  8. بت خيخه واي كلام

    ايه ده ايه النور ده يا جميل ليا زمااااان ما شوفتكيش عندي

    نورتي يا خيخه وربنا ينفعنا واياكم بصالح الاعمال

    نورتينا يا جميل

    ردحذف
  9. ابو شوشو

    لا لا لا كلا البته يا بوي ما نجدروش نطنشوها عاد

    حقيقى ما اقدر اطنشها ده انا باحبها اووووووي وكل كلمه فيها عزيزه عليا بشكل خاص

    حضرتك نورت يا فندم ومتشكره اوي على الدعوه الحلوه

    ردحذف
  10. رامي
    متشكره اوي اوي واتمنى اكون افدتكم فعلا
    ونورتنا

    ردحذف
  11. اللهم اني ظلمت نفسي ظلما كثيرا فاغفر لي فانه لايغفر الذنوب الا انت
    ________________
    بارك الله فيكي علي هذه التذكره

    ردحذف
  12. كلامك بسيط جدا ومقنع للغايه
    يارب كلنا نفهم ونعرف معنى الصلاه وفايدتها
    وان الصلاه علاقه بين الانسان وربه وكل يوم بتزيد العلاقه مع الاستمرار فى الصلاه

    ربنا يجازيكى خير

    ردحذف
  13. rack-yuorminds

    متشكره اوي ربنا يكرمك ونورت

    ردحذف
  14. مرمر
    تمام كلامك يا جميل

    وربنا يخليكى متشكره اوي نورتي يا قمر

    ردحذف
  15. أسلوبك مختلف في الدعوة :)

    ومميز بجد.. سلمت يمناكِ :)

    دمتي بود :)

    ردحذف
  16. شكرا يا ساره ربنا يخليكى ونورتينى

    ردحذف
  17. جزاكى الله خيرا

    وجعه فى ميزان حسناتك

    كل عام وانت بخير

    ردحذف
  18. ممكن
    وجزاكم مثليه احنا وانت يارب متشكره اوي

    ردحذف
  19. كل سنة وانتي طيبه
    رمضان كريم

    ردحذف
  20. جزاك الله خيرااااااا
    انا صاحب مدونه هنا السناهره وكنت اتمني زيارتي وابداء رايك في مدونتي

    ردحذف
  21. كل عام وأنتم من عواده
    وكل سنة وانت بخير
    وأسعدكم الله في عيد الفطر

    ردحذف
  22. ندى الياسمين........
    أعجبنى إنك بدأتى الموضوع بكلام عادى عامى وفيه جدعنه يعنى فلسفة الإقناع وبعدين قولتى مثال بسيط يوصل للأذن والعقل " عارفين الصلوات الخمس عاملة زى إيه زى ماتكون قلم ضربت بيه الشيطان خمس مرات باليوم" بعدين دخلتى فى الجد من قرآن كريم وأحاديث دينية سلم قلمك الصلاة عماد الدين

    ردحذف
  23. جزاك الله خير الجزاء واثابك الجنة اختى الفاضلة

    لك كل المودة

    ردحذف
  24. السلام عليكم

    ازيك يا ندى

    أنا سعيده جدا إني اتعرفت على مدوناتك

    الحقيقة أكنر من رائعين

    وبالنسبه لموضوعك ده جزاكي الله كل الخير على ماكتبتيه وربنا يجعله في ميزان حسناتك ويهدي بيكي من عصى

    هكون بإذن الله من المتابعين ليكي

    ودلوقتي هروح اشوف باقي مدوناتك

    خالص تحياتي

    ردحذف
  25. شملوله انتى كنتى بتقريلى زمان على المدونه القديمه بتهيئلي بس انا غيرت اسمي اهلا بيكى على كل حال :)

    ردحذف