رمله بنت ابي سفيان (ام حبيبه )

رملة بنت ابي سفيان

وهي ام حبيبه

وهى اقرب زوجات الرسول نسبا اليه فقد كانت ابنة عم الرسول عليه الصلاة والسلام وابوها ابو سفيان بن حرب سيد بنى اميه وكبير آل عبد شمس فكانت ذات حسب .

وكانت رمله متزوجه من عبيد الله بن جحش وكان من بعض الرجال الذين لم يكونا يؤمنون بالاصنام ويدعون لعبادة الواحد رب ابراهيم

وتزوجته رمله واسلمت هى وزوجها سافروا الى الحبشه فى الهجره الاولى للمسلمين حيث اشار الرسول على المسلمين الذين اشتد بهم اذاء قريش ىانا يهاجروا الى الحبشه لان بها ملك عادل لا يظلم عنده احد وهى ارض صدق.

وفعلا رحلوا المسلمين وبينهم رمله وزوجها وانجبت رمله من زوجها حبيبه

وهناك تعبت رمله جدا من الغربه وتعب العمل وما زاد من المها هو ارتداد زوجها عبيد الله عن الاسلام واعلانه لنصرانيتة وقد دعاها لذلك وكلنها تمسكت بدينها ورفضت وافترقت عنه ومات هو بعد ذلك وهو على نصرانيته

وظلت ام حبيبه فى الحبشه الى ان جاء اليهم حبر بان السلمين قد اعتز موقفهم وثبت وان الرسول هاجر الى المدينه مع المسلمين وان الانصار بايعوه ان الاسلام قد قوى بعون ربهم فهدت نفوسهم

 ثم جاء يوم وطرقت فيه جاريه النجاشى ملك الحبشه باب رمله واعلمتها ان رسول
 الله طلبها للزواج ففرحت زمله كثرا وخلعت من يدها سوارين من فضه واهدتهما للجاريه للبشاره وتحقق بذلك رؤيا رمله من ذى قبل فقد رأت فى منامها وكأن هناك
 من يناديها بأم المؤمنين
 .

وزوجها النجاشى من رسول الله وقد كان وكيلها خالد بن سعيد بن العاص ودفع مهرها النجاشى وجهزت جوارى النجاشى رمله للرحيل محملة بهديا نساء النجاشى ورجعت الى المدينه ومعاها باقى المسلمين بعدما امنوا ايذاء قريش.

ودخلت رمله بيت الرسول وكان ذلك هبة من الله لهابعد ما عانته فى الهجره وفى حياتها وقد فرح الرسول بعودة المهاجرين الى اوطانهم فقد عانق ابن عمه المهاجر الى الحبشه وقال : ما ادرى ؟ بايهما اسر بفتح خيبر أم بقدوم جعفر.

 وكان صلى الله عليه وسلم عائد وقتها بجيشه منتصرا على يهود خير . وقد دخلت أم حبيبه بيت الرسول فى نفس الوقت مع صفيه ولكن مع اختلاف كبير فى موقف باقى زوجات الرسول فقد رحبوا برمله ندا لهم ولكنهم انفوا ان يقبلوا صفيه ندا لهم لاصلها اليهودى .

وبعد رجوعها المدينه علم ابوها بذلك وكان من اشد اعداء الرسول لكنه كان يعلم مكانة الرسول ايضا ويحترمه رجلا وفرح بنسبه وقال انه مثل محمد لا يرد له نسب
(رغم عداوتهم للاسلام وقتها الا انه كان عارف ان محمد حد محترم وعالي المقام بصرف النظر عن كونه نبي )
 وذهب ابى سفيا لبنته ليراها بعد سنين من الغيبه رغم انه قد امتنع عن ذلك من قبل لما بينه وبني المسلمين من عداوه ولكنه ذهب اليها ليوسطها لدى رسو ل الله ليعفوا عنهم ويطيل مده المهادنه التى اتفقم عليها فى صلح الحديبيه والذى ينص على عدم تعرض اى منهم للأخر ولكنهم نقضوا العهد بعد اعتدائهم على قبيلة خزاعه حليفة المسلمين .

المهم راح فعلا لبنته ولكنه لم يجد منها ترحيب ودخل عليها حجرتها فوجد فى جانب الحجره فراش فهم ان يجلس عليه
ولكنها اسرعت فطوت الفراش فزعل ابوها وسألها ليه

 فقالت :هو فراش رسول الله وانت رجل مشرك فلم احب انت تجلس عليه.

فطبعا غضب جدا ابوها وانصرف ولكنها ظلت واجمة باكيه تدعوا الله ان يهدى اباها الى دين الحق وقد حقق الله لها منيتها فقد اسلم اباها بعد فتح مكه وفرحت بذلك فرحا شديدا . دعت لابوها عشان ربنا يهديه وكلمته بالحسنى وهو كافر مش ................... ما علينا.

وحصل حاجه ظريفه من رمله وهى على فراش الموت فقد استرضت عائشه وأم سلمه وكانوا الاثنين عاملين نفسهم قائدتين لزوجات الرسول ولكل واحده فيهم حزبها

 فقالت لعائشه:قد كان بيننا ما يكون بين الضرائر افتحلليننى . فحللتها عائشه واستغفرت لها فسرت بذلك ام حبيبه وعملت نفس الموضوع مع ام سلمه

ورحلت عن الحياه فى سنة اربعه واربيعن هجريه ودفنت فى البقيع .

حــــد القـــذف

اولا نتعرف على معنى كلمة القذف :

اصل كلمة قذف هى الرمي (الرمي بالحجاره مثلا)

والقذف الى هانتكلم عنه النهارده هو القذف بالزنى اعاذنا واعاذكم الله
او الرمي بالزنى

او الصاق تهمة الزنا بشخص

نشوف بقى الحكمه من تحريمه :

طبعا من اهم الاشياء الى بيهتم بها الاسلام اعراض الناس كمحافظه على الكرامه الانسانيه للفرد .

وتحريم القذف واقامه الحد على من وقع فيه يعد عقاب رادع لاصحاب النفوس الضعيفه والذين تسول لهم انفسهم بالغوض فى اعراض الناس واتهامهم بالزنى دون برهان واثبات على ذلك

من هو القاذف :

قلنا الى يتهم حد بدون برهان

وما هو البرهان ؟؟؟ أنا يأتي باربعة شهود على ان الشخص ده زنا

لو لم ياتي باربع شهود فهو قاذف ويقام عليه الحد

نشوف الايه بتقول ايه

بسم الله الرحمن الرحيم

وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاء فَاجْلِدُوهُمْ ثَمَانِينَ جَلْدَةً وَلا تَقْبَلُوا لَهُمْ شَهَادَةً أَبَدًا وَأُولَئِكَ هُمُ الْفَاسِقُونَ
إِلاَّ الَّذِينَ تَابُوا مِن بَعْدِ ذَلِكَ وَأَصْلَحُوا فَإِنَّ اللَّهَ غَفُورٌ رَّحِيمٌ . النور 4-5

اظن ا لايه واضحه وصريحه جدا عن عقاب القاذف هو الحد بالجلد 80 جلده واسقاط حقهم المدني فى الشهاده ووصفهم فاسقين .تمام ؟؟؟

لكن كمان مش للابد باقي الايه بتقول ان لو الشخص ده تاب واصلح وحط تحت اصلح عشر خطوط .

مش قال تبت خلاص يبقى تاب لا لازم يتوب ويصلح فتره من الزمن يبقى ماشي تمام وزي الالف ساعتها ممكن القاضي يحكم انه خلاص كده اصلح وتقبل شهادته .

الا ان فى بعض الاراء بتقول بان الاستثناء المذكور فى الايه هو ملحق على الصاق صفة الفسق بالشخص وليس على الشهاده ويقضى هذا الراي بان القاذف لا تقبل شهادته ابدا حتى لو تاب واصلح . وانما تسقط من عليه فقط صفة الفسق

نشوف كمان الايه دي بتقول ايه عن القاذفين
..
إِنَّ الَّذِينَ يَرْمُونَ الْمُحْصَنَاتِ الْغَافِلاتِ الْمُؤْمِنَاتِ لُعِنُوا فِي الدُّنْيَا وَالآخِرَةِ وَلَهُمْ عَذَابٌ عَظِيمٌ

يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ

يَوْمَئِذٍ يُوَفِّيهِمُ اللَّهُ دِينَهُمُ الْحَقَّ وَيَعْلَمُونَ أَنَّ اللَّهَ هُوَ الْحَقُّ الْمُبِينُ ... النور 23-25

الايه زي ما واضح ان الله عز وجل بيلعن القاذفين المحصنت المؤمنات

وما حدش يقولي طيب الى مش مؤمنات بقى انا اقول براحتي لان انت ما تعرفش مين مؤمن ومين لا

وما دام ما عندكش اربع شهود وتقول كلمه واحده على ست تدل على انها زانيه يبقى انت كده قذفتها واصبت كبيره من الكبائر
وطبعا كمان الايه توعدتهم بالعذاب العظيم يوم القيامه

وما ننساش ان تحريم القذف كمان مش بس للحفاظ على حقوق الفرديه لا كمان جريمة القذف من شأنها اشاعة الفاحشه فى المجتمع ككل

تخيلوا ان شخص يصاب من شرفه وهو بريء اظن من خلال الطبيعه البشريه هو ممكن يقتل الشخص اوعلى الاقل يأذيه

نشوف القرآن قال ايه عن اشاعة الفاحشه ؟؟

إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآخِرَةِ وَاللَّهُ يَعْلَمُ وَأَنتُمْ لا تَعْلَمُونَ

النور 19

وفى السنه النبويه

قال رسول الله صلى الله عليه وسلم : اجتنبوا السبع الموبقات ( أي المهلكات ) ... قالوا وما هن يا رسول الله ؟؟

قال : الشرك بالله ، والسحر ، وقتل النفس التى حرم الله ، وأكل الربا ، واكل مال اليتيم ، والتولي يوم الزحف

(الفرار من القتال )، وقذف المحصنات المؤمنات الغافلات)

ومن الحاجات المهمه الى احب اشير لها ان الايات الى سمعناها فوق دي نزلت بسبب حادث الافك للسيده عائشه وكانت التبرئه بتاعتها من التهمه من عند الله واقيم الحد على من رموا السيده عائشه رضي الله عنها

نتكلم عن حد القذف
وزي ما قلنا هو 80 جلده(عقوبه جسديه ماديه) واسقاط حق الشهاده (عقوبه ادبيه معنويه) واللعن فى الدنيا والاخره( ودي من ربنا )

طبعا القاذف لازم يكون عاقل بالغ وعمل ده باختياره مش مجبور عليه

والمقذوف كمان له شروط

العقل البلوغ الاسلام

الحريه مش عبد يعنى ( الا ان فى حديث بيقول ان من قذف مملوكه بالزنى أقيم عليه الحد يوم القيامه الا ان يكون كما قال ) يعنى له حساب فى الاخره برضه

العفه : يعني لازم يثبت ان المقذوف بريء فعلا من التهمه المنسوبه له من القاذف

والحاجه المهمه اوي الى عايزه اوضحها هنا

هو ايه الكلام الى يعد قذف للمحصنات ؟؟؟

باي كلمه تشير الى ان المقذوف زاني سواء بالتصريح القولي او الكتابه او عباره اخرى تفيد نفس المعنى سواء لغويا او شرعيا او عرفا

وامته يثبت حد القذف على القاذف ؟

الاقرار : الاعترفا من القاذف نفسه انه فعلا قذف

او بشهاده رجلين عدل


طيب الى وقع فى القذف يتوب ازاي :

عشان يتوب طبعا فوق انه يندم ويستغفر ولا يعود للذنب ثانية انه يرجع فى كلامه يكذب نفسه فى الكلام الى قذف به شخص ما .

معلش طولت عليكم

باقي بس كلمه ليا فى الموضوع ده ياريت نفهم الكلام ده كويس ونفرق بين الشتيمه والقذف واذا كان ولا بد يكون لسانك طويل وقليل الادب مافيش داعي تتعرض لشرف الناس

من فتره قريبه شوفت صوره لسياسيه

(جايز تكون خاينه وجايز تكون سفاحه واي حاجه تقولها قولها) لكن ليه تكتبوا على الصوره كلمه تسب شرفها ؟؟؟؟

من وجهة نظري المتواضعه ده قذف وسب شرف

اه هى مش مسلمه واه شرط اقامة الحد انك تكون قذفت واحده مسلمه الا ان ده مش معناه انك ما سبتهاش فى شرفها وان اكيد لها حق عندك هاتاخده يوم القيامه

زي ما وضح الرسول عليه الصلاة والسلام ان العبد جايز مالوش حق عندك فى الدنيا انما لو له فى الاخر حق هياخده .

وكتير ما اسمع حد بيتكلم عن مغنيه ولا اي حاجه ويسب فى شرفها لييييييييييييه ؟؟؟

ارجوكم بلاش الشرف بلاش اعراض الناس واعرفوا ان الحدود دي ما هى الى عقوبات اجتماعيه دونياويه لو ما اتبعهاش توبه وندم واستغفار لنا عقاب تاني خالص فى الاخره

طبعا حاليا مافيش حدود بتتطبق لكن ينفذ الحق بيد الحق فى دار الحق ان شاء الله

شكرا لكم واسفه تاني لانى طولت
نفعنا الله واياكم بصالح الاعمال

من يشري نفسه ..... صهيب بن الرومي

النهارده يا جماعه نتكلم عن ايه فى القرآن الكريم يمكن نعدي عليها وما ناخدش بالنا زي ما انا عملت فعلا ولكن عرفت ان لها معنى عظيم اوي زي باقي القرآن ولها مناسبه وقصه وانا ما كنتش اعرفها الا من كام شهر كده .

والايه بتقول :

بسم الله الرحمن الرحيم

ومن الناس من يشري نفسه ابتغاء مرضات الله والله رؤوف بالعباد

صدق الله العظيم

نعرف قصة الايه الاول

وهى نزلت فى صهيب بن الرومي . وهو ما كانش من اهل مكه الاصليين وانما هو راح مكه وهو فقير جدا وعاش فيها واشتغل وبقى ذو مال وعزوه

فلما جت الهجره مسكوه سادة قريش ومنعوه من الهجره

وقالوا : ياصهيب جئتنا صعلوكاً لاتملك شيئاً، وأنت اليوم ذو مال كثير!

فقال لهم رضي الله عنه: أرأيتم إن دللتكم على مالي هل تخلون سبيلي؟

قالوا : نعم .

وفعلا صهيب اداهم كل ممتلاكته وماله وترك كل شيء ومشي وهو مش ندمان ولا زعلان ولا خايف

لانه هجرته كانت لله ورسوله

ولما وصل المدينة دخل على رسول الله صلى الله عليه وسلم ،

فقال له عليه الصلاة والسلام : "ربح البيع أبا يحيى ربح البيع "

فعلا ربح البيع

كل واحد فينا يحط نفسه مكان صهيب ويشوف ايمانه فعلا ممكن يوصله لانه يسيب كل ما يملك بعد سنين شقا وبدايه من الصفر عشان ينصر دينه ولله ورسوله فقط ؟؟؟

و لاي حد بيتلكك ومش عايز يترك سبب المعصيه او مسببتها وظروفها بانه ما يقدرش وعليه هو هايفضل فى عنده استعداد كامل للمزاولة المعاصي

وواخدين باكلم من الايه ؟؟؟

فى الاخر بعد ما تختار ربك وطريق ربك وتسيب كل حاجه فى الاخر قال ايه ؟؟؟

والله رؤوف بالعباد

ونعم بالله تعالى

ربنا مش هايسبنا لما نختاره

يمكن نتعب بس اكيد هو ده طريق الراحه الحقيقه مش العكس

دايما اقول انجو بنفسك انجو بدينك ومش مهم اي حاجه تانيه لكن برضه بالعقل مش بالرعونه

رضي الله عنه وارضاه صهيب بن الرومي ونفعنا واياكم بصالح الاعمال

صفيه بت حيي بن الاخطب

السيدة صفيه بنت حيي:

كانت السيدة صفيه ذات نسب فقد كانت بنت حيي ابن اخطب سيد بنى النضير من اليهود وينتهى نسبها الى نبى الله هارون0

وقد تزوجت قبل اسلامها مرتين وقتل زوجها الثانى كنانه فى موقعه خيبر وكانت من اسرى المعركه ولما قسمت السبايا(الاسرى) سارت فى نصيب دحيه الكلبى فقيل للنبى صلى الله عليه وسلم عنها انها ذات نسب واصل وجمال وكان اجدى ان تكون له طبعا اعلاء لشأن الرسول وكمان عشان كمان هى زى ما بنقول بنت عز ما تتبهدلش يعنى المهم خدها الرسول فعلا وعوض دحيه الكلبى عنها بمال او اشتراها يعنى 0

طبعا احب انوه هنا ان فى ناس كده مخها على ادها بتقول ان الرسول عليه الصلاة والسلام شافها عند دحيه الكلبي وطمع فيها وخادها لنفسه .

طبعا الحكايه عمرها ما كانت سداح مداح كده . اولا كان المفروض الجواري حتى لما واحد يشتري جاريه او ياخدها غنيمه فى حرب كانت لازم يسيبها فى بيته شهر او لحد ما تحيض قبل ما يمسها .

وهنا الرسول عليه الصلاة والسلام اشترى صفيه من دحيه الكلبي عن رضا منه مش غصب عنه ولا حاجه .

وأعتقها الرسول وتزوجها وخيرها بين الاسلام واليهوديه

فقالت: يا رسول الله لقد هويت الاسلام وصدقت بك قبل ان تدعونى الى ذلك

0فأعتقها رسول الله وكان عتقها هو مهرها.

وعلى فكره صفيه كانت حلمت حلم قبل ما كنانه جوزها يموت بشاره بالرسول عليه الصلاة والسلام سبحان الله

حلمت ايه بقى:رأيت فى المنام قمرا أقبل من ناحية المدينة حتى وقع فى حجرى.

ولما حكت لزوجها كنانه غضب جدا وقال لها: ما هذا الا انك تتمنين ملك الحجاز :محمد.

وصفعها صفعه قويه على وجهها تركت اثر واضح بعد كده حتى ان الرسول سألها عن سببها وحكت له القصه.

وكان الرسول عليه الصلاة والسلام دايما يدافع عن صفيه مره دخل عليهاووجدها تبكى فسألها عن السبب فقالت: قالت لى حفصه انى بنت يهودى.

شوف بقى رد الرسول عليه الصلاة والسلام عليها

قال:انك لابنة نبي(يقصد هارون)وعمك نبي (موسى) وانك لتحت نبى(اى زوجة نبى) ففيما تفخر عليك ثم قال اتق الله يا حفصه.

شفت اد ايه شفقه الرسول وكياسته ولباقته وحسن تصرفه وذوقه

وفى قصة برضه حصلت مع صفيه تظهر اد ايه الرسول كان بيحاول دايما يبرز بيها انه ما يفرقش بين زوجاته ولا فضل لأعربى على اعجمى الا بالتقوى يعنى هى كانت يهوديه اه لكن اسلمت خلاص يبقى مش نعايرها كل شويه بانها كانت على غير ديننا حصل ايه بقى:

كانوا زوجات الرسول طالعين للحج مع الرسول عليه الصلاة والسلام وفى الطريق برك جمل صفيه بنت حيي وبكت وجاء الرسول حين أخبروه ومسح بيده دموعها وامر الناس فنزلوا فى المكان عسكروا فيه يعنى ولما جاء وقت الرحيل

قال الرسول لزينب وكانت أكثرهن ظهرا( جمال يعنى) : افقرى(أى اعيرى) ا ختك جملا . فقالت : انا أفقر يهوديتك؟

فغضب منها الرسول جدا وقاطعا طوال الحج ومن بعد الحج شهرين كمان ولم يذهب اليها ولا يقسم لها ابدا وبعد كده لما دخل عليها فضلت تسترضيه وأهدته جاريه عشان يصفح عنها واخيرا صفح عنها بعد مقاطعه كبيره رغم مكانة زينب من قلب الرسول زى ما عرفنا .

وفى قصه عجبتنى اوى اوى حصلت مع صفيه كان الرسول عليه الصلاة والسلام معتكف فى الغار وذهبت اليه صفيه لتكلمه وظلت ساعه ولما جت تخرج خرج معاها الرسول يوصلها لخارج الغار فكان فى اثنين من المسلمين مارين

فقال الرسول عليه الصلاة والسلام: على رسلكما انها صفيه بنت حيي.فقالا سبحان الله يا رسول الله فقال الرسول (ان الشيطان يجرى من ابن ادم مجرى الدم وانى خشيت ان يقذف فى قلوبكما شرا)

يا سلام القصه دى فيها معانى جميله اوى تعالى ناخدها واحده واحده

اولا ان صفيه كانت عند الرسول اثناء اعتكافه عادى يعنى مش عشان بيعبد ربنا يبقى نعض الى يجى نحيتنا زى ما بعضنا بيتخيل

ثانيا انه قام عليه الصلاة والسلام يوصلها لباب الغار مش قالها يلا فرقينا لا فى ذوق وأدب وترفق .

ثالثا بقى وده مهم أوى وهو ان الرسول عليه الصلاة والسام اتقى الشبهات يعنى فسر موقفه فورا للناس

مش قال بقى ده أنا الرسول بقى ماحدش ممكن يظن فى غلط وكمان وضح ليه هو قال كده مش عشان بقى هو مش واثق من نفسه ولا مثلا ظانن شر فى نية الى شافوه لا قال ان عارف ان الشيطان زى ما احنا بنقول شاطر وممكن يأثر على تفكيرهم وهو بكده سد باب فى وجه الشيطان

انما احنا بق ولله الحمد نلاقي واحده مثلا واقفه ساعه مثلا بتكلم واحد فى الجامعه وبعدين تقولك: ايه ده فلان ابن خلتى ولا ده جارنا ومتربيين مع بعض من واحنا فى كى جى وان

يا سلام طبعا ده مش مبرر ابدا انك تقفى تتكلمى معاه فى الشارع وبعد كده تقولى (انا طالما واثقه من نفسى ومش باعمل حاجه غلط ما يهمنيش الناس ) يا سلام وسد ابواب الشيطان ما جاتش على بالك

مش معنى كده انها لما تقابل حد تعرفه فى الشارع وجه يكلمها تخبطه بونيه لا طبعا لكن كمان ما نستهبلش .

وطبعا نفس الكلام باقوله للشباب مش البنات بس لكن الولد بقى رده بيبقى ساعات يفرس زى مثلا :

وأنا ما لى هى الى واقفه تتكلم هى حره وكأن الموضوع يخصها لواحدها انما هو ما يمسوش حاجه ليه مش عارفه

أو مثلا الرد التالى الى برضه يفرس ايه المشكله يعنى لما تقف معايا تكلمنى هو انا هاكلها ايه التخلف ده .

طب اسأله كده لو هو شاف اخته واقفه تكلم واحد ساعه ولا اكتر ولا اقل ساعتها هيبقى برضه ده موقفه طبعا لا اقل ما فى هيابادر بسؤال فى ريبه مين ده وليه وعشان ايه......... وده لو هو بارد يعنى.

ولما نقول كده يقولك مش كل الناس زى بعضها نفسى أعرف ازاى يعنى بس مش عارفه ولا فاهمه ايه مبادئهم.

احنا رغينا كتير وخرجنا عن الموضوع متأسفه .

المهم عاشت صفيه تقيه وارعه بعد وفاة النبى صلى الله عليه وسلم وماتت فى عهد معاويه سنة خمسين هجريه رضى الله عنها وأرضاها.

صور من حياة الفاروق (الجزء الاول)

السلام عليكم

حبيت يا جماعه النهارده نتكلم عن شخصيه اناباحبها اوي اوي واكيد كلكم بتحبوها طبعا

عمر بن الخطاب خليفة رسول الله ثاني الخلفاء الراشدين وامير المؤمنين والفاروق الذي فرق بين الحق والباطل

وحجة الله على حكام الارض .

شخصيه تستحق الدراسه وسيره لازم نقراها يا جماعه

طبعا لما حبيت اكتب عن عمر ما قدرتش ابدااااا اقرا عنه كل حاجه ولا اكتب عنه كل حاجه والا كان الواحد حضر ماجيستير فيه بقى .

لكن انا جمعت لكم مجموعه مواقف عمريه هانشوفها مع بعض على جزئين عشان ما تزهقوش مني

يلا نبدأ :

خرج عمر الى السوق يوما كعادته فى تفقد بلاده فيرى ابلا سمانا(جمال سمينه) تمتاز عن بقية الأبل بنموها وامتلائها فيسأل : ابل من هذه؟

قالوا :ابل عبد الله بن عمر

فانتفض عمر وقال؟:بد الله بن عمر بخ بخ يا بن أمير المؤنين؟

وارسل فى طلب عبد الله

وقال له: لمن هذه الابل يا عبد الله ؟؟

فأجابه:انها ابل هزيله اشتريتها بمالى وبعثت بها الى الحمى اى المرعى أتاجر فيها وأبتغي ما يبتغي المسلمون.

رد عمر فى تهكم شديد ونقض لابنه: ويقول الناس حين يرونها ارعوا ابل ابن امير المؤمنين اسقوا ابل بن أمير المؤمنين وهكذا تسمن ابلك ويربوا ربحك يا بن امير المؤمنين .

ثم صاح به : يا عبد الله خذ رأس مالك الذى دفعته فى هذه الابل واجعل الربح فى بيت مال المسلمين

(اه كان عمر عامل مرعي عام . بيتصرف عليه من بيت المال مكان مزروع الناس ياخدوا مواشيهم ويروحوا يرعوا فيه مجانا خدمه عامه يعنى فى وسط الصحراء ) ولا عزاء على وادي النيل

وما كانش ابنه رجل الاعمال الاول في دولة كومبونجوا ولا حاجه .

يروي عبد الرحمن بن عوف انه كان قد قدم الى المدينه قافلة تجار وخيموا عد مشارفها فقام عمر ليلا واصطحب عبد الرحمن بن عوف الى القافله ليتفقد احوالها فوجد اهلها نائمين فجلسا قريبا منها

وقال: فلنمض بقية الليل هنا نحرس ضيوفنا ...
وهما جالسان سمع عمر بكاء طفل فصمت وانتبه وانتظر ان يكف الطفل عن بكاؤوه ولكنه زاد فمضى يسرع نحوه واقترب وسمع امه تنهنه فقال:لها اتقى الله وأحسنى الى صيبك..

ثم عاد وعاود الصبى البكاء فذهب مهرولا وقال :لت لك احسنى الى صبيك

ولما عاد وسمع صوت بكاء الطفل فرجع وقال لها : ويحك انى لأراك أم سوء ما لصبيك لا يقر له قرار..

قالت وهى لا تعرف من تخاطب: يا عبد الله قد اضجرتنى انه احمله على الفطام فيأبى..

فسألها عمر: ولم تحملينه على الفطام ؟

قالت : لأن عمر لا يفرض الا للفطيم

فقال وانفاسه تتلاحق : وكم له من العمر؟

قالت : بضعة اشهر قال:ويحك لا تعجليه

ويقول عبد الرحمن بن عوف انه صلى بنا الفجر يوم ئذ وما يستبين الناس قراءته من غلبة البكاء

فلما سلم قال يا بؤساء لعمر كم قتل من أولاد المسلمين؟؟؟

ثم امر منادى ينادى فى المدينه لا تعجلوا صبيانكم على الفطام فانا نفرض من بيت المال لكل مولود فى الاسلام.وكان يفرض عطاء لكل طفل جديد فى الاسلام من بيت المال وكبت بقراره هذا لجميع ولاته فى الامصار

مش قادره اعلق على القصه دي من كتر الاطفال الى شوفتهم بيموتوا

لكن ممكن اقولكم فى واحده من سنتين رمت ابنها من الدور الرابع فى مجمع التحرير عشان ما لقيتش اكل تأكله والملاجيء قالولها ارميه فى الشارع واحنا ناخده رمتهولهم من الدور الرابع .

حسبنا الله

يقول الاحنف بن القيس:
كنت مع عمر بن الخطاب فلقيه رجل فقال: يا امير المؤمنين انطلق معي فاعدنى(انصرني عيه )على فلان فقد ظلمني .

فرفع عمر درته (عصايه خشب خفيفه اشتهر بها عمر) فخفق بها راس الرجل

وقال له تدعون امير المؤمنين وهو معرض لكم مقبل عليكم حتى اذا شغل بأمر من أمور المسلمين اتيتموه : أعدنى أعدنى (يعنى من الاخر انتم كل حاجه بقى تقولوا يا امير المؤمنين )

فانصرف الرجل غضبان أسفا فقال عمر : على بالرجل.(هاتوه)

فلما عاد ناوله مخفقته وقال له :خذ وافتقص لنفسك منى

فقال الرجل :لا والله ولكنى ادعها لله

وانصرف وعدت مع عمر الى بيته فصلى ركعتين ثم جلس يحاسب نفسه
ويقول:
ابن الخطاب ؟ كنت وضيعا فرفعك الله وكنت ضالا فهداك الله وكنت ذليلا فأعزك الله ثم حملك على رقاب الناس فجاءك رجل يستعديك فضربته فما ذا تقول لربك غدا اذا أتيته؟؟؟

اااااااااه يا عينى علينا يا غلابه

ونختم بقى بالقصه الخفيفه دي عشان ما تعيطوش مني

مره لقى ست عجوزه ماشيه تحمل شيء ثقيل فحمله عنها بعض الطريق وفى النهايه قالت له العجوز :أثابك الله خيرا يا بنى انك لاحق بالخلافة من عمر ..... فيضحك عمر ملء نفسه طبعا

اتمنى ما اكونش طولت عليكم وان شاء الله عندي شويه قصص تانيه حلوه لعمر هانعملها على جزء او اثنين لما نشوف ربنا يسهل

وشكرا لحسن استماعكم

ودعواتكم لنا وللمسلمين اجمع

الطلاق

الطلاق

من عدة ايام تابعت برنامج على احدى القنوات الفضائيه يتحدث عن الطلاق فى المسحيه . علمت من خلال ما قيل فيه ان الطلاق وان كان ابغض الحلال عند الله الا انه رحمة للعالمين وتخيلت كم المشاكل الممكن الوقوع فيها فى مسجتمع ليس فيه طلاق .

ولكن هل الطلاق الاسلامي هو ما نمارسه نحن كمسلمين ؟؟

هل تعاليم دينا تطبق فى هذا الامر المهم والحساس جدا فى حياتنا ؟؟

سأعرض عليكم اولا ما قرأته عن الطلاق :

الطَّلَاقُ مَرَّتَانِ ۖ فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ ۗ وَلَا يَحِلُّ لَكُمْ أَنْ تَأْخُذُوا مِمَّا آتَيْتُمُوهُنَّ شَيْئًا إِلَّا أَنْ يَخَافَا أَلَّا يُقِيمَا حُدُودَ اللَّهِ ۖ فَإِنْ خِفْتُمْ أَلَّا يُقِيمَا حُدُودَ اللَّهِ فَلَا جُنَاحَ عَلَيْهِمَا فِيمَا افْتَدَتْ بِهِ ۗ تِلْكَ حُدُودُ اللَّهِ فَلَا تَعْتَدُوهَا ۚ وَمَنْ يَتَعَدَّ حُدُودَ اللَّهِ فَأُولَٰئِكَ هُمُ الظَّالِمُونَ (229)

الايه دي بتقول ان الطلاق مرتين والثالثه بتكون الاخيره بعدها مافيش رجوع امساك بمعروف او تسريح باحسان

والشق التاني من الايه ولا يحل لكم أن تأخذوا...

ودي الايه الى اخدنا منها حكلم الخلع والايه بتوجه كلامها للحاكم او القاضي فان خفتك الا يقما حدود الله .....

فَإِنْ طَلَّقَهَا فَلَا تَحِلُّ لَهُ مِنْ بَعْدُ حَتَّىٰ تَنْكِحَ زَوْجًا غَيْرَهُ ۗ فَإِنْ طَلَّقَهَا فَلَا جُنَاحَ عَلَيْهِمَا أَنْ يَتَرَاجَعَا إِنْ ظَنَّا أَنْ يُقِيمَا حُدُودَ اللَّهِ ۗ وَتِلْكَ حُدُودُ اللَّهِ يُبَيِّنُهَا لِقَوْمٍ يَعْلَمُونَ (230)

ياريت نلاحظ ان كل الايام بتقول ان يقيما حدود الله .. اصل التعامل بين الزوجين مراعاة حدود الله

وَإِذَا طَلَّقْتُمُ النِّسَاءَ فَبَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ سَرِّحُوهُنَّ بِمَعْرُوفٍ ۚ وَلَا تُمْسِكُوهُنَّ ضِرَارًا لِتَعْتَدُوا ۚ وَمَنْ يَفْعَلْ ذَٰلِكَ فَقَدْ ظَلَمَ نَفْسَهُ ۚ وَلَا تَتَّخِذُوا آيَاتِ اللَّهِ هُزُوًا ۚ وَاذْكُرُوا نِعْمَتَ اللَّهِ عَلَيْكُمْ وَمَا أَنْزَلَ عَلَيْكُمْ مِنَ الْكِتَابِ وَالْحِكْمَةِ يَعِظُكُمْ بِهِ ۚ وَاتَّقُوا اللَّهَ وَاعْلَمُوا أَنَّ اللَّهَ بِكُلِّ شَيْءٍ عَلِيمٌ (231)

والايه دي بتتكلم عن الناس الى بعد الطلاق ولما يقترب موعد انتهاء العده يردوا زوجاتهم ويرجعوا يطلقوهم تاني لتطويل مدة العده لضرر النساء . وطبعا ده حرام

وَإِذَا طَلَّقْتُمُ النِّسَاءَ فَبَلَغْنَ أَجَلَهُنَّ فَلَا تَعْضُلُوهُنَّ أَنْ يَنْكِحْنَ أَزْوَاجَهُنَّ إِذَا تَرَاضَوْا بَيْنَهُمْ بِالْمَعْرُوفِ ۗ ذَٰلِكَ يُوعَظُ بِهِ مَنْ كَانَ مِنْكُمْ يُؤْمِنُ بِاللَّهِ وَالْيَوْمِ الْآخِرِ ۗ ذَٰلِكُمْ أَزْكَىٰ لَكُمْ وَأَطْهَرُ ۗ وَاللَّهُ يَعْلَمُ وَأَنْتُمْ لَا تَعْلَمُونَ (232)

والايه هنا موجهه لاهل المطلقه انهم لا يمنعوها من الرجوع لزوجها بعد الطلاق وانقضاء العده

وبيزكي الوضع بقول ذلكم أذكى لكم وأطهر

وطبعا مش هاندخل فى احكام الطلاق ووقوعه من عدمه لانها امري يطول شرحه وايضا يفضل فيها الفتوى الخاصه الفرديه بمعنى من يريد فتوى مثل ذلك يلجأ للجنة الفتوى المختصه وياخد منهم فتوى بحالته الشخصيه

ولكن طبعا فى العموم الاصل فى الطلاق النيه والعزم على الطلاق فعلا بصرف النظر عن الاقوال وحتى الايه بتقول كده

وَإِنْ عَزَمُوا الطَّلَاقَ فَإِنَّ اللَّهَ سَمِيعٌ عَلِيمٌ (227)

:واما ما توصلت له من خلال ما قرأت

ان الطلاق صحيح هو ابغض الحلال  عند الله كما قال رسول الله صلى الله عليه وسلم فى ثابت الاحاديث الا انه حل لمشاكل كتير اوي احيانا

فان استحالت العشره بين الزوجين يكون الانفصال

عشان الاسره وحدة بناء المجتمع هى حاجه مهمه اوي فى الاسلام  اصبح الطلاق هو ابغض الحلال الا ان ده لا يمنع انه حلال طبعا ومباح

لكن اكمالا للصوره الحلوه الى المفروض نكون عليها كمسلمين

وجدت ان الطلاق ده مش لازم ابدا يكون تصرف عدائي ولا خناقات ومحاكم والوضع السيء الى احنا وصلنا له ده

بمعنى تاني الطلاق له اداب له تعاليم الرسول عليه الصلاة والسلام حثنا على الالتزام بها فى الطلاق

ومن يترك هذه التعاليم هو آثم ولكن مع ذلك يقع طلاقه

طيب نعرف ايه هي :

أولا : الطلاق لازم يكون فى طهر لم يمسها فيه ... يعنى ايه ؟؟

يعنى لما يحب يطلق لازم ينتظر لما تحيض زوجته وتطهر من حيضها وبعدين يطلقها قبل ما يجامعها ولو جامعها بعد الحيض يبقى ينتظر للحيض الى بعده 

ثانيا : لو كانت حامل ممكن ينتظر عليها لما تولد حتى لا تطيل عليها العده

ثالث : ما ياخدش منها فلوس ولا ياخد منها مهرها عشان يطلقها الا لو كان القاضي يحكم بالخلع 

رابعا:انه بعد الطلاق يتركها فى بيته لحد لما تخلص عدتها ومافيش مانع حتى انه يقعد معاها فى البيت 

خامسا : ولا تنسوا الفضل بينكم نتعامل مع بعض بليونه فى الامور دي ونتفضل على بعض ونسامح بعض

يعنى نفهم من الشروط دي كلها ايه ؟؟؟

ان الطلاق مش مجرد كلمه 

مش كلمه تتقال فى ساعة غضب

لازم يكون مرتب له والواحد يفكر بعقل ويتروى

وحتى انها تظل فى بيته يعنى لعل وعسى ربنا يهديها ويهديه وسبحانه مقلب القلوب

خلاص بعد كل ده لو ما رجعوش فى كلامهم تاني بيفارقوا بالمعروووووووف

والله بالمعروف 

من غير المهازل الى بتحصل دي 

طيب ا يه مدى وجوب التزامنا باداب الطلاق دي ؟؟

نشوف الموقف ده كده ونفهم منه 

عبد الله بن عمر طلق زوجة له وهى حائض فسال عمر رضى الله عنه رسول الله عما صار فقال له رسول الله : مره فليرجعها حتى تطهر ثم تحيض ثم تطهر 

 يعنى ما دام قال يراجعها يبقى الطلاق الى فات واقع الا انه الرسول انكر عليه انه لم يلتزم باصول الطلاق وامره انه يراجعها لحد ما تطهر وينتظر عليها كمان طهر تاني

يعنى لو لم نلتزم باداب الطلاق الى فاتت دي اه هايقع الطلاق الا انه الرجل يؤثم عليه 

وده اقصى ما توصلت له من الفهم للموضوع فى الحقيقه

لان الاراء كتير اوي ومختلفه ومتشعبه جداااا

واتمنى تكونوا فهمتوا كمان مني والى عنده اي استفسار ياريت يقولي 

ومن كل قلبي باتمنى لبيوت المسلمين جميعا بالعمار والخير وربنا يبعد عنكم كل شر يارب 

لكن لو كان لابد من ابغض الحلال يااااريت نكون مسلمين ومتحضرين ونحترم بعض

وزي ما قال ربنا فى احدى ايات الطلاق ولا تنسوا الفضل بينكم

الفضل يا اهل الفضل

وتحياتي لكم وكالعاده اسفه للاطاله 

زينبت بنت جحش

وهى زوجة الرسول عليه الصلاة والسلام

و كانت بنت عمة الرسول عليه الصلاة والسلام

فأمها هى اميمه بنت عبد المطلب بن هاشم عمة الرسول عليه الصلاة والسلام وكانت ذات نسب وجمال .

وقد اسلمت صغيره وهاجرت الهجرتين وكانت مشهوره بلقب مفزع اليتامى والارامل لكثره تصدقها وعطفها عليهم .

ايه بقى كانت قصتها مع بيت النبوه

اولا نتعرف على زوجها الاول وهو زيد بن الحارثه وكان يطلق علي الحب لشدة حب الرسول علية الصلاة والسلام له وزيد كان ربيب الرسول يعنى الرسول كان كافله

قصته

كانت السيده خديجه فى زياره لابن أخوها ورجعت ومعاه زيد وهو صبى صغير رآه

الرسول فقال : والله انى لاجد فى وجهه عنصر الكرم وارى فى ملامحه مخايل الذكاء .

فاخبرته خديجه انه كان بن نعم(بن عز يعنى)

فسالها الرسو ل ان تهبه اياه فقالت هو لك يا ابن العم

ومن وقتها اعتقه الرسول وانزله منه منزلة الابن وارسل من يطمأن اهله عليه فقد كان الصبى يعلم نسبه ثم جاء اهله يفديانه ولكن الرسول طلب ان يخيروه فاختار زيد الرسول وتربى فى كنف رسول الله وكان معروف بزيد بن محمد حتى حرم التبنى

ونزلت الايه ( ادعوهم لابائهم هو اقسط عند الله......) ادعوهم: نادوهم أو اسموهم. اقسط : أعدل .

ضالمهم بعد كده زوجه الرسول من مولاته ام ايمن الحبشيه وانجب منها اسامه بن زيد وخطب له الرسول زينب ولكن زينب وأخواها رفضوا ذلك فى البدايه فقد كانت زينب من أشراف مكه اتتزوج من مولى من الموالى الى أن نزلت الايه ( ما كان لمؤمن ولا مؤمنه اذا قضى الله ورسوله أمرا ان يكون لهم الخيره من أمرهم. ومن يعص الله ورسوله فقد ضل ضلالا مبينا ) صدق الله العظيم

فلما علما زينب وأخوها بذلك رضوا بامر الله وتزوجته زينب وقد اراد بها الله ان تكون درسا للمسلمين الا يترفعن باصولهن على بعض وانما التقوى هى المقياس فلا فرق بين شريف ومولى من الموالى يعنى نوع من ازاله الفروق الطبقيه الى كانت موجوده

وفعلا تزوجت زينب بزيد ولكانهما كانوا دائمى المشاكل مع بعض وكان زيد يشكوا الى الرسول منها فيصبره وينصحه ويهون عليه من أمره .

الى ان نزل الوحى على الرسول بان زينب ستطلق من زيد وستكون زوجا له وطبعا لرسول لم يكن يستسيغ ابدا الفكره فكان زيد بمثابة ابنه ازاى يتزوج من مطلقته وده الى كان مش مقبول عند العرب

وكان محتار مش عارف رأى الناس هيكون ازى وخايف من ردة فعلهم

وحدث ان الرسول فى يوم راح يسال على زيد فى بيته لغيابه( ممكن نركز شويه فى الكلام الى جاى ده ماشى) ولم يكن ببيته فهرولت زينب للباب حين علمت

وقالت : ليس هو هاهنا يا رسول الله فادخل بابى انت وأمى يا رسول الله .

ولكن رفض الرسول الدخول ومضى وهو يتمتم( سبحان الله العظيم سبحان الله مصرف القلوب.

ولما رجع زيد وعرف الى حصل وقالت له زينب ما سمعت الرسول يتمتم به فكر شويه وودار فى باله ان الرسول سوف يأذن له فى فراق من زينب وذهب للرسول

وقاله :بلغنى انك جئت الى منزلى فهلا دخلت بأبى انت وأمى ..

وبعدين سأله : يا رسول الله افافارقها ؟

فسأله الرسول : ما لك؟أرابك منها شيء

قال زيد : لا والله يا رسول الله ما أرابنى منها شيء ولا رأيت الى خيرا؟

فقال له الرسول ناصحا: امسك عليك زوجك واتقى الله .

مع ان الرسول كان يعلم بان زينب ستطلق من زيد وتتزوج منه هو ولكنه كان يكتم الامر فى نفسه. وبعد فتره من الزمن لم يحتمل زيد العيش مع زينب وفارقها

وانتهت عدة زينب والرسول لا زال متخوف ومتردد فى التقدم لزينب زى ما قلنا.

لحد ما نزل عليه الوحى وهو جالس يتحدث الى عائشه فابتسم قائلا من يذهب الى زينب يبشرها بان الله زوجنيها؟

وتلى الرسول عليه الصلاة والسلام الايه( واذ تقول للذى أنعم الله عليه و أنعمت عليه : امسك عليك زوجك واتق الله وتخفى فى نفسك ما الله مبديه وتخشى الناس والله احق أن تخشاه . فلما قضى زيد منها وطرا زوجناكها لكيلا يكون على المؤمنين حرج فى ازواج أدعيائهم اذا قضوا منهن وطرا وكان أمرا مفعولا ) صدق الله العظيم.

ليه بقى قلنا نركز؟؟

لأن زواج الرسول من زينب بنت جحش اتقال فيه كلام كتيرأوى فى ناس بيقولوا كلام غريب أوى

هو ايه ان الرسول عليه الصلاة والسلام شاف زينب بنت جحش وهى على ذمة زيد بن حارثه وحبها وطلقها منه وتزوجها

طب بالذمه بعد الى احننا قلناه ده كلام يعقل تعالوا نوزنه ونشوف.

أولا ازاى يعنى شافها وحبها وهى على زمة زيد اذا كانت هى بنت عمته وطبعا كان يعرفها قبل الاسلام يعنى عارفها كويس وكمان بعد الاسلام ما اتفرضش الحجاب على النساء من الاول يعنى أكيد الرسول كان يعرف شكل زينب كويس لما راح زيد خصوصا انها كانت كمان زوجة زيد ربيبه يبقى ازاى يعنى لما راح ينادى زيد فوقع عينه على زينب فأرادها لنفسه وطلقها من زيد واتجوزها ازاى يعنى مش فاهمه ؟؟؟!!!!

كمان الاحاديث الى ذكرت دى كلها صحيحه ورقم اخراجها موجود لليحب

ازاى بقى بعد زيارة الرسول ووقوع حبها فى قلبه زى ما بيقولوا ااستغفر الله العظيم

سأله اذا كان يفارق زوجته فقاله ايه امسك عليك ز وجك واتقى الله .

ازاى بقى الكلام ده يدخل العقل. وغير ده كله آية القرآن واضحه جدا واظن دى بقى مافيهاش شك موضحه حكمة طلاق زيد لزينب وزواج الرسول منها بالنص( لكى لا يكون على المؤمنين حرج فى أزواج ادعيائهم) .

اظن كده ما فيهاش كلام الكلام الى بيتقال فى الموضوع ده كلام فارغ من غير ذى علم أو حد غرضه أصلا تشويه صورة الرسول لكن للأسف احنا بنردد الكلام دون علم أو دليل حتى ما بنحاولش نفكر فى الكلام قبل ما نقوله

نفسي الى يسمع كلام زي ده يدور بنفسه ويتحقق منه قبل ما يردده او حتى يقتنع به البحث مش صعب خصوصا فى عصرنا ده يمكن بحثي ورا الموضوع ده خلاني دورت فى زوجات الرسول كلهم ووجدت فيها مدرسه اجتماعيه وزوجيه عظيمه تستحق الدراسه .

المهم لما عرفت عائشه بزواج زينب طبعا غارت جدا لانها كانت عارفه انها جميله وكمان ذات نسب والى اكتر من كده ما نزل به القرآن فقد زوجها الله بأمره فقالت عائشه : تفخر علينا بهذا.

وزفت زينب للرسول وكانت تتفاخر على زوجات النبى بزواجها الذى جاء من السماء فضلا على جمالها ونسبها وكانت تقول: والله مأنا كأحد من نساء رسول الله زوجهن اهلهن وزوجنى الله من فوق سبع سموات وأنزل فى قرآن يقرأه المسلمون لا يبدل ولا

يغير.

طبعا ده اقل واجب الواحده لو جه اسمها ولا سيرتها فى مجلة ميكى هاتشيلها فوق راسها طول العمر ودي جه امر زواجها من الرسول فى القرآن لها حق يعنى تفخر

وعلم الجميع من نساء النبى مكانة زينب من نفس الرسول وخصوصا عائشه فكانت حاسه بقربها من قلب الرسول فكانت عائشه تقول :لم تكن واحده من نساء النبى تناصبنى غير زينب .

وطبعا كانوا بيغيروا منها وطبعا فاكرين حكاية العسل( أأكلت مغافير؟) الى اتفقت فيها عائشه مه حفصه و سوده بنت زمعه.

وكانت زينب مشهوره بكرمها وكثرة تصدقها بالمال فقد كانت تجيد دبغ الجلد والخرز وتبيع ما صنعت وتتصدق بثمنه على الفقراء والمساكين واليتامى.

وبعد وفاة النبى صلى الله عليه وسلم ظلت على صلاحها وبرها بالفقراء وفى أول خلافة عمر بن الخطاب ارسل اليها بعطاء خصص لزوجات النبى فأمرت خادمتها أن صبيه وغطته: وقالت غفر الله لعمر وأمرت خادمتها ان وزعته على المحتاجين ختى بقى القليل فقالت لها : يا أم المؤمين قد كان لنا فى هذا حقا

فقالت زينب : اللهم لا يدركنى عطاء لعمر بعد عامى هذا اللهم لا يدركنى هذا المال فى قابل فانه فتنه . ولما عرف عمر فارسل لها الف اخرى فوزعتها ايضا.

وكان الرسول يهزر مع زوجاته ويقول لهم اسرعكن لحاقا بى أطولكن يدا.

فكان لما يجتمع نساء النبى فى منزل احداهم بعد وفاة الرسول يمددن ايدهن الى الجدار يتطاولن ايتهن اطول يدا ولا زلن يفعلن هذا حتى ماتت زينب فعلا ان الرسول انا قصد بأطولهن يدا أكثرهن صدقه.

ووصفها الرسول ايضا لعمر بن الخطاب انها اواها (أي خاشعه متضرعه )

وحيت توفت زينب كانت اول من شيع جثمانها فى صندوق خشبي اقترحته اسماء بنت عميس على عمر بن الخطاب كما رأته فى الحبشه حتى يخرج المسلمين جميعا فى جنازتها ويسترها الصندوق

وتوفيت سنة عشرين عن عمر ثلاث وخمسون سنه(التواريخ فى الغالب بتكون تقريبيه)

ونفعنا الله واياكم بخير الثواب وشكرا عشان بتستحملوا مواضيعى الطويله