حديث الافك

قلنا واحنا بنتكلم عن السيده عائشه رضى الله عنها اننا هاتنكلم بعدين عن حديث الافك .
نحكي الحكايه من الاول زي ما حكيتها عائشه رضى الله عنها لكن انا هانقلها بلساني انا تسهيلا للامر
بتحكي عائشه وبتقول : لما كان الرسول عليه الصلاة والسلام يجى يسافر كان ببيقترع بين زوجاته والى تطلع فى القُرعه هى الى بتسافر معاه . ووفى الرمه دي كان الرسول طالع غزوه من غزواته واقترع على الزوجات وكانت عائشه هى الى هتسافر معاه .
وسافرت فعلا وكان وقتها اتفرض الحجاب علي النساء وكانت تحمل فى هودج(حاجه زي الصندوق كده بتبقى على ظهر الجمل )وطبعا ده كان مخصص للنساء فى السفر .

المهم راحوا الغزوه ورجعوا وهما راجعين وكانوا معسكرين فى مكان ولما هموا بالرحيل منه عائشه راحت بعيد تقضي حاجتها ولما رجعت وهى طالعه الهودج انفرط العقد بتاعها فنزلت تلم حباته من على الارض وسرحت شكلها ورا الحبات بعيد شويه جم الناس شالوا الهودج بتاعها وكانت صغيره فى السن وخفيفه ما لاحظوش فرق كبير يعنى شالوا الهودج ورفعوه على الجمل ومشيوا ونسيوها .

فرجعت عائشه لقت مافيش حد فقالت انا هاقعد مكاني فهما لما يحسوا انى مش معاهم هايرجعوا . وغلبها النوم ونامت مكانها .

مر بها فى الوقت ده (صفوان بن المعطل السٌلَمِي) فرأى من بعيد حد نايم فى الظلام فاقترب حتى يتبين مين نايم كل ده وعائشه نايمه ما حستش به الا وهو بيرجع لما شافها وعرفها لانه طبعا كان عارف شكلها قبل ما يضرب الحجاب .

المهم هى حست به وهوما كلمهاش خالص لكن ابتعد واناخ لها الناقه وركبت ومشي بها لحد ما وصلها للجيش مكان ما نزلوا . ولما رجعوا المدينه قعدت عائشه مريضه وفى بيت ابوها ابو بكر رضى الله عنه شهر كامل .

والى حصل ان عبد الله بن أبي سلول اتهمها هى وصفوان بايتاء الفاحشه اعاذنا الله واياكم (لمجرد انه عرف انه هو الى رجعها للقافله ).
والكلام بدأ يتناقل ووصل للرسول عليه الصلاة والسلام ولكن عائشه كانت مريضه وما تعرفش اي حاجه عن الكلام ده غير انها تقول انها كانت تشعر بتغير معاملة الرسول لها ولا تجد منه اللين والحنان الي هى متعوده عليه وخصوصا فى مرضها . وكانت مستغربه .

وبعد شهر لما بدأت تشفى وخرجت مع أم مسطح لتقضي حاجتها (كان زمان مافيش حمام كانوا بيروحوا بعيد كده عن البلد يقضوا حاجتهم والستات كانوا بيروحوا بالليل صحبه كده يخلصوا ويرجعوا صحرا بقى ) المهم عائشه عرفت من ام مسطح الى اتقال عنها .

طبعا عائشه زهلت ورجعت البيت تبكى وازادت مرضا على مرضها وسألت امها وابوها عن صحة الكلام الى سمعته فأمها قالتلها : هون عليكى مافيش ست بتكون جميله ومفضله عند جوزها الا ويكيدوا لها الناس .

طبعا عائشه فضلت تبكى طول الليله دي . واستشار الرسول اصحابه فى امرها لو شاوفوا عليها حاجه . شهد لها اسامه بالخير وعلي قال بشكل مقنع للرسول والله ربنا موسع عليك والنساء غيرها كتير ولكن اسأل عنها جاريتها وستصدقك القول . يعنى حاول يخلي الرسول برضه يسأل ويطمئن

وسأل الرسول بريره جاريتها فشهدت لها بالخير كله وقال انها لا تأخذ عليها سوى انها صغيره فى السن يعنى ممكن تسهوا على عجينها مثلا لحد ما حاجه تيجى تاكله (صغيره يعنى مش ست بيت لسه )

وما ننساش كمان اننا نقول ان زينب بنت جحش شهدت لها بالخير لما الرسول سألها عنها وده رغم غيرتهم الشديده من بعض . لكن برضه الحق حق .

المهم الرسول كده كان بدأ يطمئن لبرائتها فطلع الرسول على المنبر يشهد المسلمين على ابى سلول وقال : (يا معشر المسلمين من يعذرني من رجل قد بلغني أذاه فى اهل بيتى فوالله ما علمت على أهلي الا خيرا ولقد ذكروا رجلا ما علمت عليه الا خيرا وما كان يدخل على أهلي الامعي )

الى حصل ان ا لمسلمين اجمعوا على قتله اذا كان ده الى حصل فعلا منه لكن المشكله ان سعد بن معاذ وهو من الاوس وسعد بن عباده وهو سيد الخزرج اخذتهم الحميه قصاد بعض وعلا صوته على بعض لكن الرسول هداهم وحصل خير يعنى ..
المهم عائشه فضلت تبكى يومين وفى النهايه راح الرسول لها وقال لها :( يا عائشه انى قد بلغني عنك كذا وكذا فان كنت بريئه فسيبرئك الله وان كنت ألممت بذنب فاستغفري الله وتوبي اليه فان العبد اذا اعترف بذنبه ثم تاب الى الله تاب الله عليه .
شوفوا بقى موقف ورد عائشه رضى الله عنها رغم حداثة سنها فى الوقت ده . الاول قالت لابوها وامها يردوا على الرسول فقالوا لها : ما ندري ما نقول لرسول الله .

ردت هى : لقد سمعتم هذا الحديث حتى استقر فى أنفسكم وصدقتم به . ولئن قلت لكم إنى بريئه . والله يعلم أنى بريئه . لا تصدقونني بذلك،ولئن اعترفت بكم بأمر ، والله يعلم أنى منه بريئه لتصدقُني والله ما أجد لكم مثلا إلا قول أبي يوسف قال : فصبر جميل والله المستعان على ما تصفون .

بصراحه رد حلو اوي وانا اصريت انقله بطريقتها .

وقالت الكلمتين وادتهم ظهرها واضجعت على فراشها . وبتقول انا كنت متأكده ان ربنا هايظهر برائتى لكن ما كنت اظن انه ينزل فيا قرآن انا كان كل املي ان الرسول يشوف رؤيا مثلا تظهر براءتى.
المهم فى الوقت ده نزل الوحي على الرسول عليه الصلاة والسلام وبعدها ضحك الرسول واول ما تكلم به قال :(يا عائشه أما الله عز وجل فقد برأك)
فقالت لها امها : قومي اليه ، فردت عائشه : والله لا أقوم اليه ولا احمد الا الله عز وجل .(ردودها جامده بصراحه )

نشوف الايه بقى الى نزلت فيها :
بسم اله الرحمن الرحيم

إِنَّ الَّذِينَ جَاؤُوا بِالْإِفْكِ عُصْبَةٌ مِّنكُمْ لَا تَحْسَبُوهُ شَرًّا لَّكُم بَلْ هُوَ خَيْرٌ لَّكُمْ لِكُلِّ امْرِئٍ مِّنْهُم مَّا اكْتَسَبَ مِنَ الْإِثْمِ وَالَّذِي تَوَلَّى كِبْرَهُ مِنْهُمْ لَهُ عَذَابٌ عَظِيمٌ
لَوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا وَقَالُوا هَذَا إِفْكٌ مُّبِينٌ
لَوْلَا جَاؤُوا عَلَيْهِ بِأَرْبَعَةِ شُهَدَاء فَإِذْ لَمْ يَأْتُوا بِالشُّهَدَاء فَأُوْلَئِكَ عِندَ اللَّهِ هُمُ الْكَاذِبُونَ
وَلَوْلَا فَضْلُ اللَّهِ عَلَيْكُمْ وَرَحْمَتُهُ فِي الدُّنْيَا وَالْآخِرَةِ لَمَسَّكُمْ فِي مَا أَفَضْتُمْ فِيهِ عَذَابٌ عَظِيمٌ
إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ
وَلَوْلَا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَذَا سُبْحَانَكَ هَذَا بُهْتَانٌ عَظِيمٌ
يَعِظُكُمُ اللَّهُ أَن تَعُودُوا لِمِثْلِهِ أَبَدًا إِن كُنتُم مُّؤْمِنِينَ
وَيُبَيِّنُ اللَّهُ لَكُمُ الْآيَاتِ وَاللَّهُ عَلِيمٌ حَكِيمٌ
إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنتُمْ لَا تَعْلَمُونَ
وَلَوْلَا فَضْلُ اللَّهِ عَلَيْكُمْ وَرَحْمَتُهُ وَأَنَّ اللَّه رَؤُوفٌ رَحِيمٌ

وكده ظهرت براءة عائشه من الافك والحمد لله . عارفه انى طولت عليكم لكن ليا بس كلمتين كده عايزه اقولهم فى الموضوع ده .

اولا : القذف يا جماعه . سبحان الله تلاقي ناس اسهل ما عليها انهم يخوضوا فى اعراض الناس اعاذنا الله واياكم . بجد اوحش حاجه وافظع حاجه .وفى الغالب بيبنوا كلامهم على ظنون وحاجات مش واقعيه حتى . الشيطان بيشتغل معاهم تمام .والمصيبه الحقيقه ان الناس بتصدقهم ومن غير ما يتبينوا زي ما قالت الايه (اذا جاءكم فاسق بنبأ فتبينوا ان تصيبوا قوما بجاهله وتصبحوا على ما فعلتم نادمين ). تبينواااااااااااااا قبل ما تصدقوا ارجوكم.

ثانيا : مافيش حد فوق الشبهات . الرسول عليه الصلاة والسلام كان يعلم من هى عائشه وكانت بنت حبيبه وحبيبته وكلنا نعرف مكانة عائشه منه الا انه لما سمع ما يسيئها تبين الامر اولا. لا هو صدق الكلام على طول وهد الدنيا عليه وعليها . ولا هو كمان طنش وقال لا انا واثق فى نفسي ومراتي يبقى خلاص . بحث الامر وسأل ودور قبل ما ياخد قرار او اجراء حتى قبل ان ينزل عليه الوحي كان رايح لعائشه وبيكلمها بكل لين لانه ما ثبتش عليها حاجه وفى نفس الوقت بيتأكد منها هي كمان .

ثالثا : ان كنت على حق وان كنت مظلوما فاصبر واعتصم بالله ولا تحزن فان الله معك .

وحاسه انكم زهقتوا مني على الاخر واسفه على الاطاله جزيتم خيرا عن صبركم عليا .

عائشة بنت أبي بكر

عائشة بنت أبي بكر

ولدت السيدة عائشة بعد البعثه باربع سنين او خمسه يعنى في الإسلام والرسول عليه الصلاة والسلام عقد عليها بعد وفاه السيدة خديجه بحوالي3 سنين ولما جت الهجرة سافر أبوها أبو بكر الصديق وأمها أم رومان للمدينة وهى كمان والرسول بنى بها في المدينة بعد 3 سنين من الهجرة لأنه تركها في بيت أبوها لحد ما تبلغ وتجهز للزواج وكان عمرها تسع سنين او 11 فى اقوال اخري.

وفى موضوع السن ده اتقال كلام كتير زي ما اكيد سمعتم انها كانت طفله وازاي اتجوزها . احب اوضح حاجه بسيطه ان القول الاكثر ثبوتا انها حين بنى بها كانت عمرها 11 عاما . وده ما كانش غريب تماما على الوقت ده مش بس فى الجزيره العربيه لا وفى اروبا كمان . دوروا فى تاريخهم وانتم تعرفوا . وللعلم جدتى تزوجت وعمرها 13 عاما . وكان ليا صديقه امارتيه فى عصرنا الحالي متزوجه برضه وعمرها 13 سنه .

وقريب كان فيلم بيحكي قصه اوربيه برضه من نفس الوقت تقريبا وكانت البطله عمرها ما بين 15 سنه واتجوزت البطل الى كان عمره حوالي 30 سنه . وعموما كان الشائع وقتها ان حتى لو خطبت البنت هو عمرها خمس سنوات وده كان بيحصل . كانت تترك فى بيت ابوها حتى تبلغ مبلغ النساء . وبعدين تروح بيت جوزها .

وكانت عائشة احب زوجات الرسول إلى نفسه وكانت جميلة وذكيه ولم يتزوج الرسول بكرا إلا هي حتى انه سئل من احب النساء إلى قلبك قال عائشة ومن احب الرجال قال أبوها.

وعائشة كانت بتقول أن الرسول عليه الصلاة والسلام شافها في المنام قبل ما يتزوجها فيقول (أريتك في المنام ثلاث ليالي جاء بك الملك- جبريل- سرقه أي قطعه من حرير فيقول هذه امرأتك فاكشف عن وجهك فإذا أنت فيه فأقول أن يك هذا من عند الله فليمضه).

وفى حكايات ظريفة جدا كانت بتحصل مع الرسول وعائشة

مثلا زوجات الرسول التانيين كانوا بيغيروا من عائشة لان أصحاب الرسول عشان كانوا عارفين مكانه عائشة عند الرسول عليه الصلاة والسلام فكانوا يقصدوا يهادوا الرسول في يوم وجوده عند عائشة فاجتمعوا عند أم سلمه وكانت من زوجات الرسول إلى لهم شخصيه قويه .

وقالوا لها تطلب من الرسول انه يكلم أصحابه يهادوا أينما كان لان بقيت زوجاته يرغبون في الخير مثل عائشة فلم يرد الرسول

وبعد أن كررت الطلب ثلاث مرات قال لها(يا أم سلمه لا تؤذيني في عائشة فانه ما نزل على الوحي وأنا في لحاف امراه منكن غيرها).

وكان لما بنزل سيدنا جبريل على سيدنا محمد كان ليلقى السلام على السيدة عائشة فكانت تقول:قال لي رسول الله صلى الله عليه وسلم يوما يا عائشة هذا جبريل يقرئك السلام . فقلت يا رسول الله عليه السلام ورحمه الله وبركاته ترى ما لا أرى.

وكان الرسول عليه الصلاة والسلام يدلع عائشة ويقولها عائش أو عويش وكمان كان بيهزر معاها ويلاعبها فهي بتحكى إنها أول ما اتجوزت كانت صغيره فكان الرسول بيشيلها على كتافه عشان يفرجها على مظاهر العيد من الشباك

وكمان فى حكاية ظريفة أوى عن السيدة عائشة بتقول : إنها كانت بتساقر مع الرسول عليه الصلاة والسلام وفى مره قال للناس إلى معاه يسبقهم وقال لعائشة يلا نتسابق وكانت عائشة صغيره في السن ورفيعة كمان فجريت وسبقت الرسول فالرسول سكت لكن لما وزنها زاد رجع قالها يلا نتسابق وسبقها هو وقالها كده واحده بواحده.

شفت الرسول كان دمه خفيف وبيهزر ويجرى ويسابق مراته مش دلوقتى تلاقى أزواج ماشين طول النهار يقرفوا في بعض بس ومتخيلين إن خلاص هما اتجوزوا فخلاص يبقى يكشروا بقى يشيلوا الدنيا على دمغهم ويقرفوا في بعض كان الجواز ده خناقه أو حرب مثلا لازم يكون فيها غالب ومغلوب.

والرسول اهوه بيهزر ويلعب عشان كل الناس فاكرين أن الرسول ده أو حتى الى متدين شويه لازم يكون معقد ومش بيضحك أبدا وفى دايماعقده على جبينه وما بيعملش حاجه خالص في الدنيا غير الدين.

والسيدة عائشة كانت تعرضت لازمه كبيره جدا بس لأنها السيدة عائشة فتحملت وخرجت منها وهى كانت حادثه الإفك العظيم وهى حكاية طويلة نبقى نتكلم فيها بعدين إن شاء الله.

وعلى فكره السيدة عائشة كانت ذكيه جدا وبتحفظ كويس كانت بتحفظ قرآن واحاديث كتير اوي مرويه عنها وحتى كانت بتحفظ شعر وكل حاجه بتتقال قدامها .

وكمان عروه ابن الزبير كان بيقول إنها كانت بتبقى حافظه وصفات في الطب وسألها منين بتعرفي الوصفات دى فقالت إنها لما بتسمع حد بيوصف علاج لحد بتحفظه على طول .

عائشه كمان كانت لها ادوار مهمه جدا سياسيه كمان فى كل العصور الى عهدتها .

وكان الرسول يقول عنها : فضل عائشه على النساء كفضل الثريد على باقي الطعام (البخاري ) الثريد تقريبا عباره عن اكله من دقيق وسمن ولحم .

وحقيقى عندى كلام عن عائشه عايزه احكيه لكم اد الي اتكتب ده لكن مش عايزه اطول عليكم . لكن فى موضوع مستقل هانتكلم عن حادثة الافك ان شاء الله .

والرسول عليه الصلاة والسلام مات وهى عندها عشرين سنه تقريبا وكان في بيتها ومات وهو في حجرها

وهى ماتت وهى عندها66 سنه ودفنت في البقيع .

معاملة اهل الكتاب

بسم الله الرحمن الرحيم

اخواني فى الله

كثيرا ما تثار مناقشات عديده بيننا كمسلمين عن معاملة اهل الكتاب وخاصة ايام اعيادهم وخصوصا راس ا لسنه الميلادية فبمجرد ان تقول لاي شخص كل عام وانت بخير تقوم عليك عاصفه شنعاء عن انك تتشبه بالكفار وتشاركهم اعيادهم .

وفى اخر مناقشة لي فى هذا الامر قيل فى سياق الكلام حديث للرسول عليه الصلاة والسلام وجدته متعارض مع ما علمنا رسول الله بافعاله وسيرته فى التعامل مع اهل الكتاب وعليه بحثت الامر

واليكم نتيجة بحثي وعرض للحديث :قال رسول الله صلى الله عليه وسلم :إني راكب غدا إلى اليهود فلا تبدأوهم بالسلام وإذا سلموا عليكم فقولوا : وعليكم . مسند احمد

فى رواية تانيه : لا تبدأوهم بالسلام ، وإذا لقيتموهم في الطريق فاضطروهم إلى أضيق الطريق صححه االالباني

ولما تقرا الحديث ده وتاخده قاعده لك فى التعامل مع اهل الكتاب معناه بدأ عداوة واستمرارها لانك مش هاتسلم عليهم اصلا .

وده مش اساس التعامل الى كان بيعمله الرسول والى كلنا نعرف انه كان بيسلم على اليهودي جاره والذي كان يؤذي رسول الله ولما غاب عايده فى مرضه ووارد عن رسول الله ايضا انه كان يهديه من الأضحيه .وكمان احنا محلل لنا كمسلمين الزواج من الكتابيات معقوله نتجوزها وما نقولهاش سلام عليكم ؟؟؟؟

وقلت من سياق اكثر الرويات ان الرسول عليه الصلاة والسلام قال ده عن اليهود وقال غدا وغدا فى اللغه تحدد زمن الجمله فالحديث خاص بما سيحدث غدا وليس كسياسه عامه وارد ت البحث فى مناسبة الحديث وقابلني راي مطابق تقريبا مع رايي وهو للقرضاوي نشوف قال ايه ::

وهذا الحديث يظهر لي فيه احتمالان مقبولان:

1- أن يكون الحديث في سياق حرب بني قريظة، فنهي المسلمون من مسالمتهم؛ لأن السلام والملاطفة إشعار بالأمان بل تصريح به، فملاطفتهم في هذه الحال ربما غررتهم وخدعتهم بأن القوم جاءوا بالسلام مع أنهم جاءوا للحرب،

فكان ترك ملاطفتهم خيرا لهم، ولكن تخصيص الحديث بهذه الواقعة يحتاج إلى جمع الروايات، وتتبع طرقها ومخارجها، ليعلم هل مخرجها واحد أم لا.

اما التفسير التاني الى ممكن يكون لو اعتبرنا ان الحديث غير خاص ببنى قريظه وحال الحرب معهم طبعا من وجهة نظر القرضاوي برضه :: فغاية ما في الحديث إذن هو إيثار المسلم أخاه المسلم بالطريق عند ازدحامه، وعدم تقديم الذمي عليه؛ لأن حق المسلم على المسلم أوجب من حق غيره، فأي شيء في هذا؟ ومما قاله الفقهاء أن اضطرارهم إلى أضيق الطرق ليس معناه إلجاءهم إلى الحائط، أو إسقاطهم في حفرة مثلا فهذا من الإيذاء المحرم.وأما إذا كان الطريق واسعا فلا يجوز اضطرارهم إلى أضيق الطرق؛ لأن الإيذاء في ذاته غير مقصود قطعا، ولكن المقصود إيثار المسلم أخاه على غير المسلمين.

شوفوا كمان الدليل ده من القرآن يا جماعه :: {يَا أَيُّهَا الَّذِينَ آمَنُواْ كُونُواْ قَوَّامِينَ لِلّهِ شُهَدَاء بِالْقِسْطِ وَلاَ يَجْرِمَنَّكُمْ شَنَآنُ قَوْمٍ عَلَى أَلاَّ تَعْدِلُواْ اعْدِلُواْ هُوَ أَقْرَبُ لِلتَّقْوَى وَاتَّقُواْ اللّهَ إِنَّ اللّهَ خَبِيرٌ بِمَا تَعْمَلُونَ} (المائدة: 8)

.وكمان :(لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَن تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ (الممتحنة : 8 )

اما انا اجد فعلا التفسير الاول هو المنطقي والمتوائم مع سياسة الاسلام فى التعامل مع الذميين او الكتابيين .وعليه انا لا اجد اي مبرر ولا اي سند يقول بمعاداة الناس لمجرد انهم على غير الدين والا فكيف سندعوهم ونرغبهم فى ديننا .

وصدقونى انا لست من انصار تجميل الدين لاجتذاب الناس اليه ولكن هو دين جميل اصلا ليه نقبحه . لو كان دينا يقول بالفعل بالتعامل بحده مع الكتابيين وقصر التعامل معهم على الضروره وبغير ود فانا لن افعل غير ذلك لكنى لا ارى ذلك فى ديننا ابدا فهو ارقى من ذلك .

وتعليقا على التهنئه براس السنه الميلاديه حتى وان هنأنا بعضنا نحن بها كمسلمين ايه المشكله ؟؟؟؟!!!

الرسول عليه الصلاة والسلام قال لليهود حين صاموا عاشوراء نحن احق منكم بموسى وصام هو يوم عاشوراء؟؟؟ايه المشكله اننا نحتفل بميلاد المسيح ؟؟؟

( وبالمناسبه الرسول ما حققش مع اليهود وقاله ايه دليلكم على ان النهارده كان يوم نجاة موسى من فرعون )

عشان فى ناس بتقول اصل عيسى لم يولد فى الشتاء عشان النخله كان فيها بلح مش عارفه ايه الطبيعى فى القصه عشان النخله يطلع لها بلح فى الصيف بس ؟؟!!!القصه كلها معجزه اساسا بتتكلم في ايه ؟؟؟المهم حقيقى الناس الى بتتكلم بالنبره دي مش فاهمين الدين كويس على بساطه وجماله واتمنى تقبلوا منى بحثى الصغير وتستفيدوا منه وشكرا لكم واسفه للاطاله .ووحشتوني

سودة بنت زمعه

سوده كانت صحابية جليلة وكانت متزوجه قبل الرسول عليه الصلاة والسلام من ابن عمها السكران بن عمر وقد هاجر للحبشة في هجره المسلمين الأولى ومات وبعد ذلك تزوجها الرسول عليه الصلاة والسلام و كان ذلك بمثابة مكافأة من الله سبحانه على ما رأته في حياتها من ألم .

طب إيه الحكاية بقى كان ازاى: جاءت خوله بنت حكيم لرسول الله الصلاة والسلام راحت قالت له انه كفايه كده بقى والمفروض انه يتزوج وكان فات على موت خديجه حوالي 3 سنين فسألها مين يعنى تقترح فقالت له: بنت حبيبك . فقال :من؟ قالت: عائشة.

فقال لها لكنها صغيره فقالت اعقد عليها الآن فقط فقال ولكن من يرعى البنات إلي هما من خديجه يعنى فقالت له على سوده بنت زمعه وفعلا اتجوزها ودخل بيها قبل عائشه وكانت أول من تزوجها بعد خديجه وفضلت لواحدها حوالي 3 سنين لحد ما جت عائشه زى ما قلنا في المدينة

المهم هي كانت انسانه عظيمة واعانت الرسول على تربية بناته من خديجه وكانت نعم العون والمربيه لهم وكانت محبوبه من زوجات رسول الله كلهم وبناته .

وكانت جسمها تقيل حتى أن الرسول عليه الصلاة والسلام كان وهو بيصلي بزوجاته كان لما يحب يعاكسها يطول فى السجدة عشان ده طبعا كان يضايقها عشان هي مليانه و كمان كان يمشى وراها يقلد مشيتها.

وكانت عائشة بتحبها جدا وقالت عنها:ما رأيت أمر أه احب إلى أن أكون في مسلاخها (يعنى طريقها أو هديها) من سوده بنت زمعه إلا أن بها حده.

وعلى فكره كانت سوده كبيره في السن عن الرسول كثير لدرجه إنها لما تقدمت في السن أوي أشفقت على الرسول من عشرتها وقالت لقد وهبت يومي لعائشة على أن أبقى في جوار رسول الله لأنها كانت عارفة حب الرسول عليه الصلاة والسلام لعائشة وده طبعا إيثار منها وذكاء طبعا.

وفى موقف ظريف حصل بينها وبين عائشة بتقول إيه بقى كانت سوده عامله كعكه للرسول عليه الصلاة والسلام وعائشة كان مش بتحبها ففضلت سوده تقولها لازم تأكلي منها وبعدين قامت سوده واخدت حته وعملتها في وشها بالعافية عشان تآكل فالرسول فضل يضحك عليهم وقال لعائشة اعملي فيها زي ما عملت فيك وعملت فعلا كده. هزار تقيل شويه بس هزار برضه.
المهم بقى إيه إن سوده رضى الله عنها عاشت كثير وعمرت وماتت في المدينة في آخر خلافه عمر بن الخطاب .

4- صلة الرحم

تنويه : موضوع زوجـــات الرســـول لم يغلق هانكمله تحت نفس التبويب بس انا حبيت انوع انتظروا ان شاء الله أم المؤمنين سوده بنت زمعه رضة الله عنها


تعريف صلة الرحم:

الصلة: أو الوصل وتكون بسلام والبشاشة والهدية وما إلى ذلك

الرحم: وهى كل الأقارب من ناحية ألام أو الأب كل على حد سواء وهذا الرأي الراجح فيها

ومن ما ذكر في القرآن فقد ذهب بعض الأئمه بان هناك صلة رحم بين ا لمسلمين اجمع وده طبعا استنادا للآيات دى:

بسم الله الرحمن الرحيم إنما المؤمنين أخوه فأصلحوا بين أخوكم . وكذلك قال تعالى: فهل عسيتم لو توليتم أن تفسدوا في الأرض وتقطعوا أرحامكم. صدق الله العظيم
ومن ذلك فقد قال بعض الائمه أن هناك رحم دين يجب مراعتها

وموضوعنا صلة الرحم هنتكلم اكتر عن صلة الرحم القريبة أقارب الأم والأب عموما:

نسأل بقى ازاى تكون صلة الرحم:
هانقول كما قال ابن عابدين الحنفي: (صلة الرحم واجبه ولو كانت بسلام وتحيه وهديه ومعاونه ومجالسه وتلطف وإحسان وان كان غائبا يصلهم بالمكتوب إليهم فان قدر على السير كان أفضل)
طبعا زد على ذلك عندنا احنا غير الرسائل المكتوبه والسفر سيرا التليفون والنت وما إلى ذلك نسأل على بعض يا جماعه نسأل على بعض بس

المهم نشوف بقى أدلة ذلك من القرآن فين:

* قال تعالى: واتقوا الله الذى تساؤلون به والارحام

* وقال: فهل عسيتم لو توليتم أن تفسدوا فىالارض وتقطعوا أرحامكم اولئك الذين لعنهم الله فأصمهم وأعمى ابصارهم .

كمان طبعا الادله من السنه كتيييييره أوى هنعرض جزء منها بس:

* قال رسول الله (ص) :ان الله خلق الخلق حتى اذا فرغ من من خلقه قالت الرحم: هذا مقام العائذ بك من القطيعه. قال: نعم اما ترضين ان اصل من يصلك وأقطع من قطعك؟ قالت: بلى يارب .قال: فهو لك.

* وقال رسول الله:من سره ان يبسط له فى رزقه وأن ينسأ له فى اثره فليصل رحمه. صدق رسول الله (ص)
بمعنى يزيد له فة رزقه ويطيل له فى عمره والمقصود هنا البركه فى الصحه والعمر

* وعن عائشه انه قال: صلة الرحم وحسن الجوار وحسن الخلق يعمران الديار ويزيدان فى الاعمار.



* عن ايوب الانصارى: ان رجلا قال : يا رسول الله اخبرنى بعمل يدخلنى الجنه. فقال النبى تعبد الله ولا تشرك به شيئا.وتقيم الصلاه وتؤتى الذكاه وتصل الرحم. صدق رسول الله (ص).

* عن ابى هريره رضى الله عنه قال: سمعت رسول الله (ص) يقول : ان اعمال بنى ادم تعرض على الله تبارك وتعالى عشية كل خميس ليلة الجمعه فلا يقبل عمل قاطع الرحم)

* قال رسول الله (ص) : ما من ذنب أحرى ان يعجل الله العقاب لصاحبه فى الدنيا- مع ما يدخره له فى الأخره- من قطيعة الرحم والبغى.
يعنى زى ما احنا بنقولها بلدى كله سلف ودين ده فى الدنيا ولسه الأخره بقى

* قال رسول الله(ص): لا يدخل الجنه مدمن خمر ولامصدق بسحر ولا قاطع رحمه.
طبعا الى ماتبش منهم انما الى تاب زى ما ربنا قال (إلا من تاب وآمن وعمل صالحا ثم إهتدى فأولائك يدخلون الجنه ولا يظلمون شيئا) صدق الله العظيم 19 مريم.

* جاء رجل للرسول عليه الصلاة والسلام يقول انى لى قرابه اصلهم ويقطعونى وأحسن اليهم ويسيئون الى وأحلم عنهم ويجهلون على . فقال رسول الله:لئن كان كاما قلت فكأنما انت تسفهم المل ولا يزال معك من الله ظهير عليهم ما دمت على ذلك.
نمسك الكلام واحده واحده ونعرف معناه : اولا قال اصلهم ويقطعونى وأحسن اليهم ويسيئون الى مفهومه دى طبعا . بعد كده قال أحلم عنهم ويجهلون على : ( احلم: بضم اللام اى يترفق بهم—يجهلون: بفتح الياء أي يسيئون إلي .
ورد الرسول : تسفهم المل( تسفهم : بضم التاء يعنى تطعمهم— المل : بفتح الميم أى الرماد الحار)
بمعنى كأنك تطعمهم الرماد الحار.

وكل شيء يا جماعه ممكن نعمله لصلة الرحم مع الأقارب طبعا السلام والتبسم لهم (مش سلام عليكم من تحت الضرس ووشنا فى الأرض) وكف ا لأذى ( مش نلاقى واحد قريبى اثنين بيتفقوا عليه اقول يا بالسلامه يغور ده حتى غلس لا طبعا)

والمفروض بقى يكون بينك وبين قرايبك عموما فوق السلام والتبسم وكف الاذى :

الزياره – وعيادة المريض زيارته يعنى - الهديه( تهادوا تحابوا) – وكمان نساعد الفقير او حتى المعسر المديون يعنى - كمان نهنى بعض بالاعياد و المناسبات الحلوه - نقف كمان جمب بعض فى الافراح والمناسبات الى مش حلوه وفاه مثلا - وكمان الاقربون اولى بالمعروف ( نميزهم فى الصدقه والمعامله الحلوه وتحمل الاذى والنصح والتعليم وطبعا اى حاجه كويسه نقدر عليها يكون للاقارب نصيب فيها)

حتى ربنا بيقول: وأمر اهلك بالصلاه واصطبر عليها--- وكمان بيقول ربنا: يا أيها الناس قو أنفسكم وأهليكم النار. صدق الله العظيم

وشوفوا بقى صحابة رسول الله:
عندما نزلت الآيه: ولن تنالوا البر حتى تنفقوا مما تحبون. قال ابو طلحه: ان أحب مالى الى بير حاء انها صدقة لله تعالى ارجو برها وذخرها عند الله تعالى, فضعها رسول الله حيث أراك الله. فقال رسول الله : بخ هذا مال رابح,هذا مال رابح, وقد سمعت ما قلت وأنى أرى ان تجعلها فى الاقربين فقال ابو طلحه : أفعل يا رسول الله فقسمها ابو طلحه فىاقاربه وبنى عمه.

وقال رسول الله ( ص) الصدقه على المسكين صدقه وعلى ذى الرحم ثنتين صدقه ورحم.
وقال رسول الله :تعلموا من أنسابكم ما تصلون به أرحامكم.

وطبعا اكيد كلنا عارفين ان من صور البر بالوالدين حتى بعد موتهم هو صلة رحمهم يعنى مش عشان والدك مات ما تشوفش اعمامك بقى خلاص لا طبعا.

كمان فى حاجه مهمه صلة الرحم فيها درجات يعنى المسلم مش زى الكافر والمسلم الفاسق والفاجر غير المسلم الصالح
بس امته نقطع العلاقه تماما ده لو كان قريبك كافر ربنا يعفينا ولكن تكون الصله هنا بالدعاء ليه ومحاولة النصح له
اما لو كان مسلم ولكنه فاسق وكافر فاذا كان مجاهر بفجره وذنبه يعنى ماشى يقول لكل الناس وفرحان بفجره فطبعا هجره بيكون زى عقاب ليه وكمان حمايه لنفسك من صحبته ولكن لا تجب القطيعه ولكن تحديد العلاقه وكمان برضه الدعاء والنصح وما الى ذلك
اما لو كان غير مجاهر يعنى يادوب انت بتمسمع عنه بس انه مش كويس يبقى لا تقطع صلتك به وبرضه حاول فى نصحه وارشاده .

ياريت يا جماعه نكلم بعض ونسأل على بعض ونعرف أقاربنا شيء يحزن ان اقارب كتير ولاد عم مثلا او ولاد خال وما يعرفوش بعض خالص اتمنى ان ربنا يعفو عنا ويرحمنا كلنا ويتوب علينا. ويعلم الله انى لى رحم يقطعنى وأكره ذلك وقد احسبنى فى تقصير والله اعلم واسأل الله العفو والرحمه واسأله ان يهدينى واياكم صراط مستقيم.

نسأل الله العفو والعافيه والاجر والغفران.

السيده خديجه بنت خويلد

السلام عليكم ورحمة الله وبركاته

احبائي فى الله النهارده هانبدا سلسله من الموضوعات عن زوجات الرسول ان شاء الله والى انا شايفه انها مدرسه اجتماعيه وزوجيه على الوجه الاخص عظيمه جدا جدا .
واحب انوه ان انا عملت الدراسه بشأنها بعد ما ناقشنى بعض الناس بشكل سيء حول زيجات الرسول وظروفها ولا سيما زواجه بالسيده زنيب بنت جحش .
وده خلانى ادور فى الموضوع واعجبت به وكتبت عنه البحث الصغير ده واتمنى تشاروكوني فيه
ومراجعي فيه كانت مجموعة كتب صغيره بالاضافه الى كتاب نساء بيت النبوه لعائشه بعد الرحمن ده بالنسبه للاسانيد والوقائع انما التعليقات والتحليلات ليا .

وطبعا هانبدأ كلام عن السيده خديجه رضى الله عنها الى لو كتبنا عنها كتاب مش هانكفيها حقها .

السيدة خديجه بنت خويلد

وقد لقبت قبل الإسلام بالطاهرة العفيفة وبعد الإسلام بأم المؤمنين وكانت ورثت عن أبيها خويلد القرشي ثروة طائلة واشتغلت في التجارة وكانت مشتهرة بالحزم ورجاحة العقل وقد تزوجت مرتين قبل الرسول عليه السلام
وقد كان الرسول عليه الصلاة والسلام يعمل معها وكان اصغر منها بخمسة عشر عاما وكانت السيدة خديجه جميلة وذكيه يسعى إليها الرجال لكنها كانت ترفض الزواج وفعلا راحت للرسول عليه الصلاة والسلام وكان فعلا يميل إلى خديجه ولكنه كان يخاف رفضها أو يرى أنها ذات مقام عالي وكان الزواج وأصبحت خديجه بعد ذلك أم المؤمنين بعد الرسالة
واكيد كان لها حكمه زواجه منها لان فى المرحله دي من كان محتاج حد يقويه ويكون له مركزه ويمنع عنه أذى المشركين وطبعا خديجه رضى الله عنها كانت نعم السند لانها كانت شخصيه قويه ومرموقه ومسموعه كلمتها فى مكه وقتها .
وكان الرسول عليه الصلاة والسلام يكن لها كل الحب والاحترام حتى بعد موتها فكانت السيدة عائشة تقول : ما غرت على أحد من نساء النبي كما غرت على خديجه وما رايتها.
الرسول عليه الصلاة والسلام كان يكرم خديجه حتى بعد موتها يكرمها فى اصحابها واهلها ولحد ما مات الرسول كان يودهم وكان يرتاع لما يسمع صوت اختها هاله بنت خويلد لان صوتها كان زي صوت خديجه . تخيلوا ؟؟ يا بختها . بجد تحس انه كان بيحبها اوي وشايل جميلها على راسه واكيد هى كانت تستحق كده .

وفى مره كان الرسول عليه الصلاة والسلام يشكر في خديجه فغارت عائشه وقالت له: ما كانت إلا عجوز أبدلك الله خير منها . فغضب الرسول عليه الصلاة والسلام لدرجه أن عائشة دعت ربنا انه يذهب غضب النبي عنها وهى مش هتذكر خديجه بسوء مره ثانيه وقال لها الرسول عليه الصلاة والسلام:لا والله ما أبدلني الله خير منها آمنت إذ كفر الناس وصدقتني و كذبني الناس وواستني في مالها إذ حرمني الناس ورزقني منها أولادا إذ حرمني أولاد الناس . ولما رأى جزع طائلة لغضبه قال : كيف قلت ؟ والله قد آمنت بي إذ كذبني الناس وآوتني إذ رفضني الناس ورزقت منها الولد وحرمتموه منى.

وقد قال الرسول عنها :افضل نساء أهل الجنة خديجه بنت خويلد وفاطمة بنت محمد عليه الصلاة السلام و مريم بنت عمران آسيه بنت مزاحم أمراه فرعون. صدق رسول الله صلى اله عليه وسلم.

وقال :اتاني جبريل فقال : يا رسول الله هذه خديجه قد أتتك ومعها اناء فيه طعام أو إدام أو شراب وإذا هي قد أتتك فاقرأ عليها من ربها السلام ومني . البخاري
فأي فضل لها رضي الله عنها .
وماتت السيده خديجه بعد زواج بالرسول دام اربعه وعشرون سنه ويزيد ودفنت رضى الله عنها فى مكه .
رضى الله عنها وارضاها لن نوفيها حقها مهما قلنا .
وشكرا لكم واسفه على الاطاله

التوبه

قال الله تعالى (وَ تُوبُوا إلَى اللهِ جَمِيعاً أيًًََُُُُها المؤمين لعلكم تفلحون ). النور 31

وقال تعالى استغفروا ربكم ثم توبوا اليه. هود 90

يا ايها الذن امنوا توبوا الى الله توبة نصوحا. التحريم 8 صدق الله العظيم

عن ابى هريره رضى الله عنه قال : سمعت رسول الله صلى الله عليه وسلم يقول.انى والله لاستغفرن الله أتوب اليه فى اليوم أكثر من سبعين مره . رواه البخارى وده الرسول شوف بقى احنا نعمل ايه فى نفسنا؟

عن الغر يسار المزنى رضى الله عنه عن النبى صلى الله عليه وسلم يا ايها الناس توبوا الى الله واستغفروه فانى اتوب فى اليوم مائة مره .رواه مسلم

وعن أبى موسى عبد الله الأشعرى رضى الله عنه عن النبى صلى الله عليه وسلم قال ان الله تعالى يبسط يده باليل ليتوب مسيء النهار ويبسط يده بالنهار ليتوب مسيء الليل حتى تطلع الشمس من مغربها.
وطلوع الشمس من مغربها دى احدى العلامات الكبرى ليوم القيامة شوف بقى كرم ربنا بس الناس اللى مش واخده بالها أو مستبعدين يوم طلوع الشمس من مغربها مع انه والله قريب أوى مننا كلنا كل الموضوع نموت ويبقى خلاص كل شيء انتهى.(بيقولوا قربت تطلع من الغرب فى المريخ يعنى الدور علينا يا حلوين )

وعن ابى هريره رضى الله عنه ان رسول الله صلى الله عليه وسلم قال يضحك الله سبحانه وتعالى الى رجلين يقتل احدهما الاخر يدخلان الجنه يقاتل هذا فى سبيل الله فيقتل ثم يتوب الله على القاتل فيسلم فيستشهد.

فى قصة كمان جميله أو عن التوبه حصلت ايام الرسول عليه الصلاة والسلام :

جاءت امرأه من جهينه الى رسول الله صلى الله عليه وسلم وهى حبلى من الزنا وقالت يا رسول الله اصبت حدا فأقمه على فدعا نبى الله وليها فقال احسن اليها فاذا وضعت فاتنى ففعل فأمرها النبى ان تذهب حتى تتم رضاعة ابنها
وفعلا راحت ولما اتمت الرضاعة جاءت الى النبى معها الولد وفى ايده أكل عشان الرسول يصدق انه خلاص بياكل المهم أخذ الرسول الطفل ورفعه بيده وقال من يكفل هذا ويكون رفيقى فى الجنه فطبعا تخاطف عليه الصحابه
وبعدين امر الرسول فشدت المرأه بحبل ورجمت كما يأمرنا الله تعالى فى كتابه العزيز باقامة حد الزنا وهو الرجم وبعدين صلى الرسول عليه الصلاة والسلام عليها فقال له عمر نصلى عليها يا رسول الله وقد زنت
قال النبى لقد تابت توبة لو قسمت بين سبعين من أهل المدينه لوسعتهم هل وجدت من أن جادت بنفسها لله عز وجل . رواه مسلم
وعلى فكره ما كانش فى شهود ولا حاجه على الواقعه هى راحت من نفسها كده واعترفت بعد ندم طبعا وتوبه نصوح شفت اد ايه بقى التوبه قريبه وشفت الرسول بيستغفر ربنا ويتوب كام مره فى اليوم
تخيل بقى المفروض احنا نتوب كم مره فى اليوم وأنا دلوقتى لما اجى بس اقول لواحد آيه ولا حديث عن التوبه يقولي أتوب عن ايه هو انا كنت كفرت أنا مش وحش والله انا بس مش باصلى
أو انا بس باعرف بنات لكن عمرى ما وقعت فى الحرام وكأن الزنا هو الحرام الوحيد فى الدنيا وخلى بالك كده مع كل ده هو مش وحش امال الوحش يبقى مين مش عارفه

لكن دايما كده المؤمن الحق يشوف اقل ذنب ليه كأنه جبل فوق دماغه لكن بقى الى مش فى دماغه ينيل الدنيا ويقولك انا عملت حاجه ده غيرى بيعمل وبيعمل ويعد كل الفاسقين بقى اللى يعرفهم واللى ما يعرفهمش
طب ليه بتعد دول ما فى كمان ناس بتعرف ربنا وكويسين بتقارن نفسك بما هو ادنى ليه يارب يكون كلامى له معنى فى قلوب أى حد يقراه وربنا يتوب علينا جميعا ويقبل استغفارنا وتوبتنا.

المهم ايه هى بقى التوبه النصوح لها 3 شروط بس شوف السهوله بقى:

أولا : الندم على الذنب : نندم ونستغفر على الى احنا عملناه ونتوب لله ونصلى وندعى ربنا ونسجد لربنا ونتحايل عليه يغفر لنا عارفين يعنى ايه نتحايل عليه زى ما طفل صغير بيتحايل على أمه مثلا بيعمل ايه؟
بيعيط صح عيط انت كمان اغسل قلبك وانت قدام ربنا صدقنى هاتحس براحه كبيره جدا .

ثاينا: العزم فعلا على عدم الرجوع لهذه المعصيه تانى ابدا: فى نفسك كده تقول ان شاء الله انا ابدا ما عدتش اقرب المعصيه دى ابدا خلاص عهد كده بينى وبين ربنا وفعلا تنفذ مش كلام كده فى الزنقه وخلاص.

ثالثا : رد الحقوق الى اصحابها : يجى واحد يقولى ازاى ده مش ممكن اروح لواحدة اقولها انا اسف انا قلت عليكى انك كذا وكذا بعد مثلا عشر سنين فاتوا ماشى اللى نقدر ترجعه لصاحبه نرجعه انما مثلا النميمه .
أو اى حاجه عملتها فى أى بنى ادم ما تعرفش ترجعها حاول تعوضه عنها بالدعاء والاستغفار له وبره اذا كانت علاقتك به مازالت قائمه أو اذا كان مات مثلا أو ما تقدرش ترجعه لأى سبب مثلا انك ما تعرفش صاحبه تصدق به وأكثر من الصدقات

بس كده والله بعدها تبقى نضيف من غير ذنوب خالص حاجه يعنى اى حد يتمناها ولا ايه ربنا يتوب علينا جميعا يارب.

وفعلا ربنا كبير اوي ورحيم اوي وما حدش يقول مش معقول اتوب ومش معقول ربنا يغفرفي شوفوا الحديث القدسي ده .

يقول الله عز وجل ما غضبت على أحد كغضبى على عبد أتى معصية فتعاظمت عليه فى جنب عفوى

وكمان :

إنى لأجدنى أستحى من عبدى يرفع الى يديه يقول يارب يارب فأردهما فتقول الملائكة الى هنا إنه ليس أهلا لتغفر له فأقول ولكنى أهل التقوى وأهل المغفرة أشهدكم إنى قد غفرت لعبدى"

كمان فى حاجه قريتها مره مش عارفه مين القائل لكن هي عاجباني :

"لا تسئم من الوقوف على بابه ولو طردت"
"ولا تقطع الاعتذار ولو رددت""

فان فتح الباب للمقبولين فادخل دخول المتطفلين

ومد اليه يدك وقل له مسكين

فتصدق عليه فإنما الصدقات للفقراء والمساكين"

وربنا يقبل مننا توبتنا يارب ويتقبل صالح اعمالنا ويرحمنا وشكرا لكم